شرح وتعريف الاجر | المرتب | اجر الاشتراك التاميني | وحساب البدلات المعفاه

شرح وتعريف الاجر | المرتب | اجر الاشتراك التاميني | وحساب البدلات المعفاه

فيديو النهارده شرح وتعريف الاجر | المرتب | اجر الاشتراك التاميني | وطريقة حساب البدلات المعفاه ، هنتكلم فيه عن الاجر / الراتب ، وايه تعريفه في قانون العمل وقانون التأمينات والفرق بينهم.

كمان هنعرف ازاي نحدد اجر الاشتراك التأميني وحساب البدلات المعفاه.

 

---

Video Script

الاجر مقسم لاكتر من مسمى ، وطبعا فروق بين القطاع الحكومي والقطاع الخاص

 

الاول خلينا نتكلم ايه هو الأجر

 

• قانون العمل في القطاع الخاص عرف الأجر بأنه كل ما يحصل عليه العامل من صاحب العمل لقاء عمله سواء نقدي أو عيني

( يعني فلوس نقديه أو مزايا عينية زي منتجات بالقسط – اتوبيسات للنقل – موبايل .. وخلافه )

• لكن في قانون التأمينات الأجر هو كل ما يحصل عليه العامل من صاحب العمل نقديًا.

وقال إن الاجر دا اسمه ( أجر الإشتراك التأميني ) يعني الاجر اللي هنحسب عليه نسب التأمينات.

---

معلش بس ايه اللخبطة !!

نيجي كدا من الاول تاني

ونتكلم ع الاجر بغض النظر عن القوانين

 

الاجر في الشركة هو:

• اجر اساسي ( ودا ال Basic الثابت شهريا للعامل “يعني طالما بيحضر وملتزم هيقبضه بالكامل ومش بيتأثر غير بالغياب او التأخير او الجزاءات ) يعني بالمناسبة لما بنحسب غياب او تأخير او اضافي بنحسبة بناء على الاجر الاساسي.
• اجر متغير ( ودي الفلوس اللي دايما فيها تحرك شهري بالزيادة أو النقص زي البونص والكوميشن او العمولة والحوافز وال kpis ومقابل التشغيل الاضافي مثلا زي الاوفر تايم او شغل يوم اجازة رسمية او راحة اسبوعية .. وخلافه ).
• بدلات ( ودي المبالغ اللي بتتصرف للعامل نتيجة لسبب معين زي إننا ندي للعامل بدل مواصلات عن كل يوم اشتغل فيه أو بدل موبايل لانه بيستخدم موبايله في الشغل ).
• وكام حاجه كمان زي الوهبة ولكن بشروط معينة.

---

طيب كل دا هنتعامل عليه إزاي

بص يا سيدي

وإنتا بتعين الموظف هتحدد كل عناصر الاجر اللي هيقبضها بناء على لائحة الشركة عندك

وبعد ما يمضي على ال Job Offer هنعمل الاتي

 

• هنحسب كل اللي فات دا ونجمعه على بعض.
• ناخد المجموع دا ونتعامل معاه وكأنه هو اجر الإشتراك التأمييني.
• لو في عندنا بدلات ( ممكن ناخد إعفاء لحد 25% من اجمالي اجر الاشتراك التأميني )
  • وهنعرف ازاي نحسب البدلات دي بعد كدا.
• وبعد كدا هناخد اجمالي قيمة اجر الاشتراك + البدلات المعفاه ( إذا وجدت ) ونجمعهم مع بعض = وهو دا الاجر الشامل.
  • وخلي بالك إن الاجر الشامل ملوش تعريف اكتر من دا بالنسبة للقطاع الخاص إلا إنه في القطاع الحكومي بيحسب فيه الفلوس اللي بتدفع للتأمينات واللي بتتحملها الحكومة لحساب العامل.

---

سيبنا من كل دا وتعالوا نحسب بشكل عملي.

 

موظف مرتبه عن شهر يناير 2020 كالتالي:

• اجر اساسي 1800 جنيه
• اجمالي اجور متغيرة 3225 ( يعني اضافي + حوافز + مكافأة + عمولات )
• وله بدل سيارة 500 جنيه
• وكمان له بدل ملبس 500 جنيه

 

اولا:

عندنا اجر اساسي = 1800

اجر متغير          = 3225

وكمان بدلات       = 1000

يبقا الاجمالي       = 6025

 

إذا اجر الإشتراك التأميني اللي هندفع عنه تأمينات كل شهر = 6025

طيب مش إحنا عندنا بدلات ( ليه ندفع عنها كلها تأمينات )

 

القانون إدانا 25% إعفاء من قيمة اجر الاشتراك ( اللي هيبقا مكتوب في النهايه )

طيب نحسبها إزاي !!

ناخد ال 6025 ونقسمهم على 125%  هيساوي   4820  جنيه

 

إذا اجر الاشتراك بعد الإعفاء القانوني = 4820

+ الاعفاء القانوني = 1205

هيساوي نفس الرقم اللي كان معانا وهو 6025

 

وعشان نتأكد إننا ماشيين صح إضرب ال 4820 × 25%  ولو طلع نفس الرقم بتاع الاعفاءات اللي هو 1205 يبقا حسبتك كانت صح .

 

أخر خطوة إننا هناخد اجر الاشتراك اللي هو بقا 4820 + البدلات المعفاه اللي هي 1205 واللي هيساوي 6025 ونكتبه في الاجر الشامل.

 

اخر حاجه بقا نبقا عارفينها إن اجر الإشتراك التأميني في نهاية الحسبة لا يقل عن 1000 ولا يتعدى ال 7000

يعني لو طلع معانا 7500 نكتب 7000 ولو طلع 950 نكتب 1000 والحدود دي لحد 13 / 12 / 2020م.

---

جدول الحدود الدنيا والقصوى لأجر الإشتراك التأميني

• الأرقام عاليه بموجب الكتاب الدوري رقم 4 لسنة 2020م.