
التدريب والتطوير في الموارد البشرية والتطبيق العملي للشغل
التدريب والتطوير في الموارد البشرية والتطبيق العملي للشغل
النهاردة هنتكلم عن التدريب والتطوير في الموارد البشرية والتطبيق العملي للشغل – هنعرف مع بعض تعريفهم والفرق بين كل مصطلح والهدف منهم وطريقة تطبيق كل مفهوم في الواقع العملي بالشغل.
قبل أى شىء لازم نعرف أيه الفرق بين التدريب والتطوير ؟
التدريب:- خطوات مهمة بعملها علشان أحسن معارف ومهارات الموظفين اللي عندي علشان استفيد منهم على المدى القصير.
مثال:- نفرض مثلا انى هعطى موظفين المبيعات بتوعي دورة تدريبية في السيلز علشان بدل ماكانوا بيبيعوا ب1000 يبيعيو ب1500. هجيب مكن جديد يقلل الوقت والجهد وهعمل برنامج تدريبي للعمال علشان يعرفوا يشتغلوا عليه.
الفئة المستهدفة:- الأفراد منخفضي الأداء مرتفعي السلوك.
كيفية معرفة ذلك:- من خلال تقييم الأداء والملاحظة المباشرة.
التطوير:- بعمله علشان أحسن معارف ومهارات الموظفين اللي عندي علشان استفيد منهم على المدى البعيد.
مثال:- تأهيل الموظف (أ) لتولي منصب مدير الموارد البشرية بعد عام. نقل الموظف (أ) لمنصب قيادي لسد خلل بالشركة.
الفئة المستهدفة:- الكفائات (الأشخاص مرتفعي الأداء مرتفعي السلوك).
كيفية معرفة ذلك:- من خلال تقييم الأداء وخطة الإحلال والتجديد والنقل للمؤسسة.
التدريب والتطوير – تعريفهم والفرق والهدف منهم
الدائرة التدريبية
أي تدريب ناجح لازم يمشي وفقاً للدائرة التدريبية وده بتشتمل على أربع حجات
1- تحليل الإحتياجات التدريبية Training Needs Analysis او ( TNA )
2- تصميم التدريب Training Design
3- إلقاء التدريب والدعم Training Delivery and Support
4- تقييم التدريب Training Evaluation
كل عنصر من الأربع عناصر دول ليه أليه معينة بيتنفذ بيها بشكل تقني وده لضمان فاعلية البرنامج التدريبي وضمان تحقيق الهدف المرجو من التدريب. وإن شاء الله سيتم تناول كل عنصر بالتفصيل على حدة ابقوا معنا.
التدريب والتطوير – تعريفهم والفرق والهدف منهم
تحليل الإحتياجات التدريبية Training Needs Analysis
زي ما إتفقنا إن أي تدريب ناجح لازم يكون مبني على الدائرة التدريبية اللي هي بتتكون من أربع حجات (تحليل الاحتياجات التدريبية – تصميم التدريب – إلقاء التدريب – تقييم التدريب) تعالوا نتكلم عن أول حاجه في الدائرة التدريبية (تحليل الاحتيجات التدريبية)
يعني أيه تحليل الاحتيجات التدريبية؟
يعني ببساطة أنا عاوز اعمل التدريب ده ليه؟ بحلل احتياجاتي التدريبية من 3 جوانب:-
1- تحليل الوضع المؤسسي (Corporate Analysis) يعني ببساطة الشركة ده ناويه على أيه؟ لو ناويه تتوسع أو ناوية تجيب مكن جديد أو ناوية تعمل أليه جديدة للعمل أو ناوية تحقق ميزة تنافسية أو ناوية تزود إنتاجها بنفس أو ناوية تقلل تكاليف الإنتاج أو الشركة ده عندها مشكلة في ضعف أداء الأفراد أو …. أو …. هنا يبقى الشركة ده محتاجة برنامج تدريبي لموظفيها. يعني من الاخر تحليل الوضع المؤسسي ياأما علشان أسد خلل عندى في الشركة أو علشان أحقق ميزة إضافية.
2- تحليل الوظيفة (Job Analysis) يعني مثلا قسم السيلز عندي إنتاجيته ضعيفه وتقييم الأداء بتاعه ضعيف والمبيعات تعبانه، هبتدي أحلل هي الوظيفةده فيها خلل ليه؛ لو السبب هو ضعف الأداء أو استحداث نظم جديدة في البيع أو الشركات المنافسة بتبيع أكتر بسبب إنهم بيستخدموا أساليب جديدة مش عندي يبقى أنا محتاج تدريب.
3- تحليل أداء الأفراد (Personnel Analysis) عندي مثلا موظف طلع تقييم أدائة متوسط الأداء أو منخفض الأداء والموظف ده شخص ملتزم جدا في الحضور والانصراف شخص على خلق شخص عينه بتلمع كده وعنده رغبه في التعلم وتطوير نفسه شخص بيقعد يدور على النت لما تواجهه مشكلة وبيحاول يحلها ويقعد بعد أوقات العمل يدور فيها، الشخص ده وديه تدريب وعلى ضمنتي.
التدريب والتطوير في الموارد البشرية والتطبيق العملي للشغل
تصميم التدريب Training Design
لما اجي أصمم برنامج تدريبي بركز على حاجتين أول حاجة المدرب تاني حاجه التكلفة.
أولا: المدرب:-
- لازم أدور على حد يكون عنده خبره عملية في المجال.
- يجب أن يكون معاه شهادة T.O.T
- كمان يفضل يكون ليه اسم على النت لأنه غالبا لو ملوش اسم على النت هيكون يأما واحد تعبان لسه مبتدأ يا أما راجل عجوز ملوش في النت ود طبعا لو جبته هيعلم الناس بعقلية الأله الكاتبه.
- مفيش مانع إنك تجيبه شركتك وتعمله تيست يشرح حاجه كده تجربه فيها ويكون معاك عينه من الموظفين اللى هيتعملهم التدريب وتحكموا عليه وتقيموه.
- حاول تجيب مدرب بيعرف يجيب أمثله وعنده أساليب متعدده في الشرح.
ثانيا: التكلفة:-
تكلفة مباشرة: مصاريف التدريب – إيجار الفصول – المواصلات – الوجبات – أدوات الشرح …. إلخ.
تكلفة غير مباشرة: وقت العمل المستقطع لصالح التدريب – أتوبيسات العمل (إذا كانت تستخدم في التدريب).
من أهم الحجات برده اللى لازم أحسبها في المرحلة ده العائد على الاستثمار ROI وده بيتحسب قبل وبعد وأثناء التدريب
قبل (الأرباح المتوقعه من التدريب)
أثناء (الأرباح التي تتحقق من العمل أثناء فترة التدريب)
بعد (تحقيق نسبة الربح المستهدف من التدريب)
طب ازاى احسب ال ROI ؟
إجمالي الأرباح المجنية من التدريب – إجمالي التكاليف (المباشرة وغير المباشرة) / إجمالي التكاليف * 100 = ROI
ملحوظة هامه:- لو الربح طلع أقل من 11% متعملش التدريب ده لأن في نظرية مشهورة في البيزنس بتقلك لو ربحك أقل من 11% حط فلوسك في البنك أحسن وخد عليها أرباح بدل ماتتعب نفسك على الفاضي.
التدريب والتطوير – تعريفهم والفرق والهدف منهم
إلقاء التدريب والدعم Training Delivery and Support
بعد ما حددنا احتياجتنا التدريبية وصممنا البرنامج التدريبي وحسبنا ال ROI وعرفنا إن التدريب الحمد لله هيجبلنا أرباح كويسه فوق ال11%، هنيجي بقى لمرحلة مهمة وهي إلقاء التدريب، ودور إخصائي التدريب هنا بيبقى كتالي:-
- كلم المدرب يوم التدريب فكره بميعاد التدريب وبرده فكر المتدربين.
- روح مكان التدريب بدري قبل الناس ماتيجي وأتأكد إن كل حاجه تمام يعني مواد التدريب موجودة وأدوات التدريب موجودة وكمان بص على الخدمة يعني نسق عملية المشروبات مع إدارة المكان ووقت الاستراحة وغيره، وياريت كمان تبص على الحمام وتتأكد من إن نضيف ومعد جيداً للاستخدام مينفعش يبقى الراجل بتاعك قاعد عاوز يخش الحمام ومش راضي يخش علشان الحمام مش نضيف كده مش هيفهم حاجة.
- بص على المدرب من بره كده من وقت لاخر ولاحظ وشوش الناس وانطباعتهم.
- مفيش مانع تستأذن من المدرب إنك تخش تحضر المحاضرة برده تشوفه ملتزم بالمعايير اللى حطتها ولا لأ.
- خلي المتدربين يقيموا المدرب كل محاضرة علشان ده هيفيدك في مرحلة التقييم بعد كده وخليهم كمان يكتبوا تعليقاتهم ومقترحاتهم وناقشها مع المدرب.
التدريب والتطوير – تعريفهم والفرق والهدف منهم
تقييم التدريب Training Evaluation
اخر حاجة في الدائرة التدريبية هي تقييم التدريب وده بيتم بأربعة أساليب:-
- الاختبار: شوف نتائج اختبارات المتدربين في اخر البرنامج التدريبي أو اعملهم انت اختبار نظري أو عملي وشوف هل وصلوا للأهداف المرجوه من التدريب ولا لسه.
- المعرفة: برده من خلال الاختبارات، شوف هل انعكست المعرفة اللي تحصلوا عليها من التدريب على أداء الأفراد ولا لأ.
- ملاحظة السلوك: وده غالبا بتبقى في الوظائف اللي ليها احتكاك بالجمهور، عندك مثلا العامل (أ) اللي شغال ويتر قبل التدريب مكنش بيعتذر للزباين لو الطلب أتأخر ومكنش بيبتسم في وش الزبون كان بيقدم كوباية الشاي مملية لحد اخرها وبتقع على الزبون لما يجي يشربها كان الزباين بتشتكي منه، أكيد لو استفاد من التدريب هيبان على سلوكه.
- النتائج: وده غالبا بتبقى للوظائف اللي بتجيب فلوس بشكل مباشر زي السيلز والماركتينج، يعني مثلاً كانوا بيبيعوا بمليون بعد التدريب بقوا بيبيعوا بمليون ونص.
وبوجه عام بيتم التقييم من خلال أربعة حجات (الربحية – الإنتاجية – الجودة – إرضاء العميل)
ملحوظة: ياريت تعمل KPIs للتدريب قبل ماتعمله
ودا مقال تاني هنتعلم فيه طريقة تصميم تدريب فعال لموظفين الشركة : Developing Staff Training Program Guide
Tag:ROI, TNA, training design, training evaluation, التدريب, التدريب والتطوير - الفرق والهدف منهم, التدريب والتطوير المهني, التدريب والتطوير الوظيفي, التدريب والتطوير في الموارد البشرية, التدريب والتطوير في الموارد البشرية pdf, التدريب والتطوير للموارد البشرية, التدريب والتطوير للموظفين, التدريب والتطوير موارد بشرية, التطوير, العائد على الاستثمار, اهمية التدريب والتطوير للموظف الاداري, تدريب وتطوير, تدريب وتطوير وتوظيف, تصميم التدريب, تقييم التدريب, قسم التدريب والتطوير للموارد البشرية, نظام التدريب والتطوير, هيئة التدريب والتطوير