ازاي تتفاوض على مرتبك في عرض الشغل – لأي تخصص
ازاي تتفاوض على مرتبك في عرض الشغل – لأي تخصص
النهارده هنتكلم عن ازاي تتفاوض على مرتبك في عرض الشغل – لأي تخصص ، ودا لأن ناس كتير بتقبل اول رقم بيتقال خوفا إن العرض يتسحب ، وناس تانية بتطلب رقم مالوش علاقة بالسوق فتخسر الفرصة.
في المقالة دي هنعرف ازاي تجهز رقمك قبل المكالمة ، وتقارن الباكدج كلها مش المرتب بس ، وايه الجمل اللي تقولها لما يسألوك او لما العرض يبقى اقل ، وازاي ترد على العرض بايميل ، ومعاها ورقة تفاوض word فيها كل ده بالعربي والانجليزي.
الاول متفقين إن التفاوض مش خناقة ولا شحاتة. الشركة اللي بعتتلك عرض عايزاك ، وانت عايز الشغل ، والتفاوض هو انكم توصلوا لرقم وبنود الطرفين مرتاحين ليها. واغلب النتيجة بتتحدد في التحضير قبل المكالمة.
| قبل المكالمة3 ارقام | الباكدج9 بنود | الجمل الجاهزة4 | الردايميل عربي وانجليزي |
جهز 3 ارقام قبل المكالمة
1
نطاق السوق
2
رقمك المستهدف
3
اقل رقم تقبله
نطاق السوق: اعرف الوظيفة دي بتاخد كام في السوق من اكتر من مصدر: اعلانات وظايف فيها مرتب ، وزمايل في نفس المجال والمستوى ، وشركات التوظيف. وما تعتمدش على رقم واحد سمعته.
رقمك المستهدف: رقم واقعي في النص العالي من النطاق ، على حسب خبرتك وقد ايه انت مناسب للوظيفة.
اقل رقم تقبله: الرقم اللي لو العرض اقل منه هتعتذر. ده ليك انت بس.
قارن الباكدج كلها مش المرتب بس
عرضين بنفس المرتب ممكن يفرقوا كتير: واحد فيه تأمين طبي وبدل مواصلات وتأمينات على الاجر الحقيقي ، والتاني لأ. في الورقة جدول تقارن فيه 9 بنود بين شغلك الحالي والعرض الجديد:
- المرتب الاساسي والشامل
- البدلات (مواصلات – سكن – تليفون)
- الحوافز والعمولات وطريقة حسابها
- التأمين الطبي
- التأمينات الاجتماعية على الاجر الحقيقي
- الاجازات
- مواعيد الشغل والشغل من البيت
- التدريب والشهادات
- ميعاد اول زيادة او تقييم
خلي بالك. لو المرتب ما بيتحركش ، ساعات بند تاني يتحرك: مراجعة بعد 6 شهور ، بدل ، يوم شغل من البيت ، او شهادة مهنية على حساب الشركة.
ايه تقول وايه ما تقولش
قول كدا
✓ “نطاق السوق للدور ده من ……… لـ ………. ممكن اعرف النطاق عندكم؟”
✓ “متحمس للدور ، وبناء على خبرتي في ……… كنت متوقع ……… . ينفع نوصل لكدا؟”
✓ “ممكن العرض مكتوب بكل البنود؟”
ما تقولش كدا
✗ “انا محتاج الفلوس عشان عندي التزامات” – التفاوض على قيمة الشغل مش على ظروفك.
✗ “اي رقم تشوفوه مناسب” – كدا سبت التفاوض كله.
✗ “عندي عرض تاني اعلى” وهو مش موجود.
ايميل الرد على العرض
بعد المكالمة ، ابعت رد مكتوب قصير: شكر ، وحماسك للدور ، والرقم اللي بتطلبه وسببه ، وبديل لو الرقم مش متاح. الورقة فيها الايميل جاهز بالعربي والانجليزي ، وانت بتغير الكلام اللي بين النقط.
الأثر العملي: ما تستقيلش من شغلك الحالي قبل ما العرض الجديد يوصلك مكتوب ومتمضي ، بكل البنود اللي اتفقتوا عليها.
اسئلة شائعة عن التفاوض على المرتب
اقول المرتب المتوقع الاول ولا استنى؟
لو اتسألت ، قول نطاق مش رقم واحد ، واسأل عن النطاق المحدد للوظيفة عندهم.
ينفع اتفاوض لو انا fresh graduate؟
ينفع ، بس على بنود زي التدريب والمواصلات ومراجعة المرتب بعد فترة اكتر من المرتب نفسه.
لو قالوا ده آخر رقم؟
شوف البنود التانية في الباكدج ، او اتفق على مراجعة بعد 6 شهور مكتوبة في العرض.
التفاوض ممكن يخلي العرض يتسحب؟
التفاوض المحترم المبني على السوق نادرا ما بيسحب عرض. اللي بيضر هو الرقم البعيد عن السوق او الاسلوب.
خلاصة
اعرف نطاق السوق من اكتر من مصدر ، وحدد رقمك واقل رقم تقبله ، وقارن الباكدج كلها ، وكلم الشركة بهدوء وبأسباب ، واطلب العرض مكتوب قبل ما تقبل.
وفي الختام ارجو يكون المقال افاد حضراتكم ولو بجزء بسيط في الشغل.
بتدور على شغل في تخصصك؟
فريق كارييريانز للتوظيف بيوصل المرشحين بالشركات في كل التخصصات ، ويساعدك تجهز الـ CV والانترفيو.
تابع ايضا:
اسئلة الانترفيو وازاي تجهز لها
تعلم كتابة CV – سيرة ذاتية باسلوب محترف وسليم
اسئلة انترفيو HR وشئون العاملين والاجابات النموذجية
كمان تقدر تتابع قناتنا على اليوتيوب لمزيد من الشروحات: إتعلم Personnel
المقال والورقة خبرة عملية في التوظيف ، ومفيش فيهم ارقام مرتبات. نطاق السوق لكل وظيفة اعرفه من اكتر من مصدر وقت التفاوض.
You may also like
تحميل نماذج CV بالانجليزي word جاهزة 2027 مع اخطاء لازم تتجنبها
