هل شركتك ملتزمة بقانون العمل الجديد؟ قائمة فحص 25 نقطة لمراجعة الالتزام
هل شركتك ملتزمة بقانون العمل الجديد؟ قائمة فحص 25 نقطة لمراجعة الالتزام
النهارده هنتكلم عن سؤال بيتسأل بطريقتين: “قانون العمل الجديد بيتطبق امتى؟” و”هل شركتنا ملتزمة بيه؟” ، والاجابة على الاولى سهلة: من اول سبتمبر 2025. لكن التانية محتاجة مراجعة حقيقية لورق الشركة.
فعملنا لك قائمة فحص من 25 نقطة مقسمة على 5 محاور ، كل نقطة معاها رقم المادة ، تمشي عليها وتحط علامة قدام اللي عندك وتعرف الفجوات فين ، ومعاها ملف Word تحمله وتطبعه.
الاول متفقين إن المادة 6 من القانون بتبطل اي شرط ينتقص من حقوق العامل حتى لو كان متفق عليه قبل القانون. يعني العقود واللوايح القديمة مش “محمية” لأنها اتعملت زمان ، ولازم تتراجع على القانون الجديد.
| بدء التطبيق1 سبتمبر 2025 | عدد نقاط الفحص25 نقطة | المحاور5 محاور | الملفWord |
ازاي تستخدم قائمة الفحص
- امشي على النقط واحدة واحدة ، وافتح الورق الفعلي مش اللي في دماغك.
- حط “موجود” بس لو المستند موجود ومحدث ومطابق للمادة.
- اي نقطة “ناقص” اكتب قدامها مين المسئول وتاريخ التصحيح.
- ابدأ بالنقط اللي غرامتها بتتعدد بعدد العمال.
قائمة الفحص الكاملة – 25 نقطة
| م | المحور | النقطة | المادة |
|---|---|---|---|
| 1 | العقود والتعيين | عقد مكتوب بالعربي من 4 نسخ لكل موظف | 89 |
| 2 | العقود والتعيين | فترة اختبار لا تزيد عن 3 شهور ومرة واحدة | 90 |
| 3 | العقود والتعيين | شهادة قيد لكل عامل او قيده خلال 30 يوم ، وردها خلال 45 يوم | 33 و35 |
| 4 | العقود والتعيين | ملف لكل موظف بالبيانات والمستندات المطلوبة | 92 |
| 5 | العقود والتعيين | س1 لكل موظف خلال اسبوعين من التحاقه | تأمينات |
| 6 | مكتب العمل | بيان المنشأة خلال 30 يوم من بدء العمل | 36 |
| 7 | مكتب العمل | بيان التعديلات والشواغر والاحتياجات في يناير | 36 |
| 8 | مكتب العمل | لائحة تنظيم العمل معتمدة ومعلقة (10 عمال فأكثر) | 137 |
| 9 | مكتب العمل | المزايا المطبقة فعليا مكتوبة في اللائحة | قرار 162 |
| 10 | مكتب العمل | سجل الجزاءات وحساب خاص للحصيلة | 153 |
| 11 | الاجور | كشوف اجور موقعة او تحويل بنكي + بيان مفردات الاجر | 115 |
| 12 | الاجور | العلاوة الدورية 3% من الاجر التأميني | 12 |
| 13 | الاجور | تطبيق قرارات المجلس القومي للأجور (الحد الادنى) | 104 |
| 14 | الاجور | حجز وتوريد ضريبة كسب العمل | قانون 91/2005 |
| 15 | الاجور | التأمين على الاجر الفعلي في حدود الحد الادنى والاقصى | قانون 148/2019 |
| 16 | الوقت والاجازات | ساعات العمل في حدود 8 يوميا / 48 اسبوعيا | 117 |
| 17 | الوقت والاجازات | حساب الاضافي بالنسب القانونية | 121 |
| 18 | الوقت والاجازات | اجازة الوضع 4 شهور وساعة الحامل وفترات الرضاعة | 54 و56 |
| 19 | الوقت والاجازات | رصيد اجازات سنوية مسجل لكل موظف | 92 |
| 20 | الوقت والاجازات | حظر التحرش والتنمر والتمييز مكتوب في اللائحة | 4 و5 |
| 21 | الانضباط وانتهاء الخدمة | التحقيق خلال 7 ايام والجزاء خلال 30 يوم من انتهاء التحقيق | 138 و141 |
| 22 | الانضباط وانتهاء الخدمة | لا فصل الا بحكم المحكمة العمالية | 148 |
| 23 | الانضباط وانتهاء الخدمة | استقالات معتمدة من مكتب العمل او اتفاق تراضي مكتوب | 167 وقرار 187 |
| 24 | الانضباط وانتهاء الخدمة | مهلة اخطار 3 شهور مكتوبة | 156 |
| 25 | الانضباط وانتهاء الخدمة | شهادة خبرة خلال 15 يوم ونموذج 6 خلال اسبوع | 175 |
خلي بالك. القائمة دي بتقيس الحد الادنى اللي القانون بيطلبه. لو شركتك بتدي مزايا اكتر (اجازات او مواعيد او بدلات) فدي بتفضل قائمة ولازم تتكتب في اللائحة (قرار 162 لسنة 2026 – المادة 3).
نموذج تقرير نتيجة الفحص
تقرير فحص الالتزام بقانون العمل – شركة ……………… – تاريخ الفحص: / / 20
الأثر العملي: الشركات اللي بتعمل الفحص ده مرة كل 6 شهور بتكتشف الفجوة قبل التفتيش او قبل النزاع. وخلي بالك إن اغلب الغرامات بتتعدد بعدد العمال – التفاصيل في مقال غرامات وعقوبات قانون العمل الجديد.
اسئلة شائعة عن الالتزام بقانون العمل الجديد
قانون العمل الجديد بيتطبق امتى؟
اتنشر في 3 مايو 2025 واتعمل بيه من اول سبتمبر 2025 (المادة 13 من مواد الاصدار) ، والمحاكم العمالية من اول اكتوبر 2025.
ايه اهم التزامات صاحب العمل في القانون الجديد؟
العقد المكتوب من 4 نسخ ، ملف الموظف ، بيانات مكتب العمل ، الاجور الموثقة والعلاوة 3% ، ساعات العمل والاضافي ، لائحة تنظيم العمل لو 10 عمال فأكثر ، واجراءات الجزاء وانتهاء الخدمة.
كل قد ايه اراجع الالتزام؟
مرة كل 6 شهور على الاقل ، ومع اي قرار وزاري جديد.
هل العقود القديمة لازم تتغير؟
اي بند فيها ينتقص من حقوق العامل المقررة في القانون الجديد بيقع باطل (المادة 6) ، فراجعها وعدّل اللي محتاج تعديل.
خلاصة
25 نقطة في 5 محاور بتغطي اللي اي تفتيش او نزاع هيسأل عليه. امشي عليهم بالورق الفعلي ، اكتب الفجوات ومين يصححها ، واعد الفحص كل 6 شهور.
وفي الختام ارجو يكون المقال افاد حضراتكم ولو بجزء بسيط في الشغل.
عايز حد يعمل الفحص ده لشركتك؟
فريق كارييريانز بيعمل مراجعة التزام كاملة على قانون العمل 14 لسنة 2025 وقراراته ، ويسلمك تقرير بالفجوات وخطة تصحيح بالاولويات.
تابع ايضا:
ملخص قانون العمل الجديد – اهم 20 تغيير على صاحب العمل والشركات
غرامات وعقوبات قانون العمل الجديد على المنشآت وازاي تتجنبها
تفتيش مكتب العمل والتأمينات على الشركات – ايه اللي بيطلبوه وازاي تجهز
اول 10 خطوات HR لازم اي شركة جديدة تعملها قانونيا
كمان تقدر تتابع قناتنا على اليوتيوب لمزيد من الشروحات: إتعلم Personnel
نقاط الفحص وأرقام المواد منقولة من نص قانون العمل رقم 14 لسنة 2025 وقراري وزير العمل 162 لسنة 2026 و187 لسنة 2025 وقانوني التأمينات 148 لسنة 2019 والضريبة على الدخل 91 لسنة 2005. القائمة أداة مراجعة داخلية وليست بديلا عن الاستشارة القانونية.
