ملخص قانون العمل الجديد – اهم 20 تغيير على صاحب العمل والشركات

1. عقد العمل من ٤ نسخ بدل ٣

المادة 89 بتلزم صاحب العمل يكتب العقد بالعربي من اربع نسخ: نسخة للشركة ، ونسخة للعامل ، ونسخة تتودع في مكتب التأمين الاجتماعي ، والرابعة في الجهة الادارية المختصة. ولو العامل اجنبي ينفع العقد يتكتب بالعربي ولغته ، وعند الاختلاف العربي هو اللي بيتطبق.

2. العلاوة الدورية بقت ٣٪ من الاجر التأميني

زمان كانت 7% من الاجر الاساسي ، دلوقتي المادة 12 بتقول علاوة سنوية دورية لا تقل عن 3% من الاجر التأميني ، وبتستحق بعد سنة من التعيين او من آخر علاوة. ولو الشركة بتمر بظروف اقتصادية صعبة ، بيتعرض الامر على المجلس القومي للأجور للبت في تخفيضها او الاعفاء منها خلال 30 يوم.

3. الابراء خلال العقد او ٣ شهور بعده باطل

المادة 6 بتبطل اي شرط او اتفاق ينتقص من حقوق العامل ، واي ابراء من حقوق العامل خلال مدة العقد او خلال ثلاثة اشهر من انتهائه. يعني ورقة “ابراء ذمة نهائي” يوم ما الموظف يمشي مش هتحميك ، اللي بيحميك هو ايصال استلام بمبالغ محددة.

4. أنماط العمل الجديدة بنفس الحقوق

المادة 96 عرفت العمل عن بعد والعمل بعض الوقت والعمل المرن كأنماط عمل جديدة ، والمادة 97 قالت إن اللي بيشتغل بيها ليه نفس حقوق العامل العادي من حماية اجتماعية وحد ادنى للأجر وتدريب ، والمادة 99 اشترطت عقد مكتوب ورقي او الكتروني.

5. إجازة الوضع بقت ٤ شهور ولحد ٣ مرات

بدل 90 يوم ومرتين ، المادة 54 خلتها اربع شهور مدفوعة الاجر على الا تقل المدة بعد الوضع عن 45 يوم ، ولحد 3 مرات طوال مدة الخدمة ، وبيتخصم من الاجر اللي بتدفعه الشركة التعويض اللي بتصرفه التأمينات.

6. ساعة اقل للحامل من الشهر السادس

نفس المادة 54 بتخفض ساعات العمل اليومية للحامل ساعة على الاقل من الشهر السادس للحمل. وكمان المادة 56 بتدي المرضعة لحد سنتين بعد الوضع فترتين رضاعة كل واحدة نص ساعة على الاقل ، ومن حقها تضمهم.

7. يوم إجازة للأب يوم الولادة

المادة 128 ادت العامل اللي بيتولد له مولود اجازة طارئة مدفوعة الاجر يوم الولادة ، مش بتتحسب من رصيد اجازاته السنوية ، بحد اقصى 3 مرات طوال مدة الخدمة. ده غير الاجازة العارضة اللي فضلت 7 ايام في السنة وبحد اقصى يومين في المرة.

8. ساعات العمل والاضافي

المادة 117 حطت الحد الاقصى 8 ساعات فعلية في اليوم او 48 في الاسبوع من غير فترات الراحة ، وسياسة الشركة هي اللي بتحدد ساعاتها جوه الحد ده. والاضافي طبقا للمادة 121 مش اقل من الاجر + 35% للساعة النهارية و70% لليلية. الحساب بالامثلة وشيت الاكسيل في مقال طريقة حساب اجر الاضافي وساعات العمل.

خلي بالك. القانون بيحط حد اقصى وحد ادنى ، وسياسة شركتك هي اللي بتحدد جوه الحدود دي. يعني لو شركتك بتدي 22 يوم اجازة سنوية او مواعيدها 7 ساعات ، الميزة دي بتفضل قائمة ومينفعش تتلغى بحجة إن القانون بيقول اقل (المادة 6).

9. حظر التحرش والتنمر والتمييز صراحة

المادة 4 بتحظر السخرة والتحرش والتنمر واي عنف لفظي او جسدي او نفسي على العامل ، وبتحيل للائحة المنشأة تحديد الجزاءات. والمادة 5 بتحظر التمييز في التدريب والاعلان عن الوظائف وشروط العمل بسبب الدين او العقيدة او الجنس او غيرها.

10. لائحة تنظيم العمل خلال ٦٠ يوم

المادة 137 بتلزم اي شركة فيها 10 عمال فأكثر تعمل لائحة تنظيم عمل خلال 60 يوم من بداية النشاط او من نفاذ القانون ، وتسلم نسخة للجهة الادارية للتصديق ، ولو الجهة ما ردتش خلال 30 يوم اللائحة بتبقى نافذة. وقرار 162 لسنة 2026 حدد البنود الـ 15 الالزامية فيها – شرحناه في مقال تحميل قرار لائحة تنظيم العمل.

11. المزايا المطبقة فعليا لازم تتكتب

المادة 3 من قرار 162 بتقول إن اللائحة لازم تتضمن كل المزايا المطبقة فعليا قبل اعدادها ، حتى لو مالهاش نص مكتوب وجت من الممارسة. يعني قبل ما تكتب اللائحة احصر كل اللي بتديه للموظفين فعلا.

12. مواعيد التحقيق والجزاء بقت محددة

التحقيق يبدأ خلال 7 ايام من اكتشاف المخالفة ، وما يعديش 3 شهور الا لو ظهرت وقائع جديدة فيتمد 3 شهور كمان (المادة 141) ، ومينفعش توقع جزاء بعد 30 يوم من انتهاء التحقيق (المادة 138). النموذج الكامل تلاقيه في مقال تحميل لائحة الجزاءات وسجل الجزاءات.

13. الفصل بحكم المحكمة العمالية بس

المادة 148 خلت جزاء الفصل من اختصاص المحكمة العمالية ، ومينفعش الا لو العامل ارتكب خطأ جسيم ، وحددت حالاته زي تقديم مستندات مزورة ، وافشاء الاسرار اللي سبب ضرر جسيم ، ومنافسة صاحب العمل ، والاعتداء على صاحب العمل او المدير العام.

14. استقالة معتمدة من الجهة الادارية

المادة 167: الاستقالة مكتوبة وموقعة من العامل او وكيله الخاص ومعتمدة من الجهة الادارية المختصة ، والخدمة ما بتنتهيش الا بقرار قبول الاستقالة ، ولو الشركة ما ردتش خلال 10 ايام تعتبر مقبولة. التفاصيل والنموذج في مقال تحميل نموذج الاستقالة الجديد.

15. العدول عن الاستقالة خلال ١٠ ايام

نفس المادة ادت العامل حق يرجع في استقالته خلال 10 ايام من اخطاره بقبولها ، بشرط يكون العدول مكتوب ومعتمد من الجهة الادارية ، وساعتها الاستقالة تعتبر كأن لم تكن.

16. الانهاء بالتراضي من غير اعتماد استقالة

المادة 6 من قرار 187 لسنة 2025 قالت إن احكام اعتماد الاستقالة ما بتسريش على اتفاق الطرفين على انهاء العقد بالتراضي ، بشرط يتكتب اتفاق “تحلل او تقايل” فيه ما يفيد إن العامل استلم كل مستحقاته. النموذج جاهز في مقال تحميل نموذج انهاء عقد العمل بالتراضي.

17. مهلة الاخطار ٣ شهور

في العقد غير محدد المدة ، اي طرف عايز ينهيه لازم يخطر التاني كتابة قبلها بـ 3 شهور (المادة 156) ، ومينفعش تتفقوا على الغاء المهلة او تقليلها لكن ينفع تزودوها ، وصاحب العمل بس هو اللي ممكن يعفي العامل منها لو العامل هو اللي بينهي (المادة 161).

18. الغياب اللي يعتبر استقالة

المادة 166: العامل يعتبر مستقيل لو غاب من غير مبرر اكتر من 20 يوم متقطعة في السنة او اكتر من 10 ايام متتالية ، بشرط انذار بخطاب موصى عليه بعلم الوصول بعد 10 ايام غياب في الحالة الاولى و5 ايام في التانية.

19. شهادة الخبرة خلال ١٥ يوم

المادة 175 بتلزم صاحب العمل عند انتهاء العلاقة يدي العامل شهادة فيها تاريخ التحاقه وانتهاء خدمته ونوع شغله والمزايا ، خلال 15 يوم من طلبها ، ويرد له اوراقه وشهاداته وادواته اللي عنده.

20. تسوية ودية ثم محكمة عمالية متخصصة

المادة 149: اي نزاع فردي ينفع يتطلب تسويته وديا خلال 10 ايام من نشوئه قدام لجنة برئاسة مدير مديرية العمل ، واللجنة تخلص خلال 21 يوم. ولو ما حصلتش تسوية بيتحال للمحكمة العمالية (المادة 150) ، واللي اتنشأت في دائرة كل محكمة ابتدائية (المادة 176).

الأثر العملي: مش كل التغييرات دي هتفرق معاك بنفس الدرجة. اول 5 حاجات تبدأ بيهم في اي شركة: نموذج العقد (4 نسخ) ، العلاوة الدورية 3% ، اجراءات الاستقالة والانهاء بالتراضي ، لائحة تنظيم العمل لو عندك 10 عمال فأكثر ، وحذف اي ورقة “ابراء ذمة عام” من ملف انهاء الخدمة. وخلي بالك إن اغلب الغرامات في القانون بتتعدد بعدد العمال اللي حصلت في حقهم المخالفة ، زي المادة 288 من 500 لـ 5000 جنيه عن كل عامل.

عايز تتأكد إن شركتك ماشية صح على القانون الجديد؟

فريق كارييريانز يراجع عقودك ولايحتك وسياسات الاجازات والاجور وانهاء الخدمة مقابل قانون العمل 14 لسنة 2025 وقراراته ، ويسلمك تقرير بالفجوات وخطة تصحيحها.

اطلب مراجعة الامتثال