تحميل لائحة الجزاءات وسجل الجزاءات وفقا لقانون العمل الجديد وطريقة التصرف في حصيلة الجزاءات
ايه هي لائحة الجزاءات في قانون العمل الجديد؟ وتتصرف ازاي في حصيلة الجزاءات؟
النهارده هنتكلم عن لائحة الجزاءات وسجل الجزاءات وفقا لقانون العمل الجديد وطريقة التصرف في حصيلة الجزاءات ، ودا لأن القانون 14 لسنة 2025 غيّر حاجات مهمة في الجزاءات: مين يوقعها ، وامتى ، وبكام بالظبط ، والفلوس اللي بتتخصم بتروح فين.
في المقالة دي هنشرح الجزاءات المسموح بيها والسقوف الرقمية واجراءات التحقيق وحالات الفصل ، وازاي تمسك سجل الجزاءات وحساب الحصيلة ، ومعاهم نموذج لائحة جزاءات Word + شيت Excel لسجل الجزاءات بيحسب الخصم ويطلعلك تنبيه لو عديت الحد القانوني.
الاول متفقين إن المادة 137 بتلزم كل صاحب عمل عنده 10 عمال فأكثر يعمل لائحة تنظيم عمل فيها “المخالفات التي تمثل خروجا على مقتضى الواجب الوظيفي والجزاءات التأديبية” ، والمادة 138 بتقول إن لائحة الجزاءات هي اللي بتحدد المخالفات والجزاء المقرر لكل واحدة بما يحقق التناسب ، في حدود الجزاءات اللي حددتها المادة 139. يعني مينفعش تخترع جزاء من عندك ، ومينفعش توقع جزاء على مخالفة مش مكتوبة في اللائحة المعتمدة.
| السندم ١٣٧ – ١٤٨ و١٥٣ | حد الخصم للمخالفةأجر ٥ ايام | حد الخصم في الشهرأجر ٥ ايام | الملزم باللائحة١٠ عمال فأكثر | الملفاتWord + Excel |
الجزاءات المسموح بيها في قانون العمل الجديد
المادة 139 حددت الجزاءات التأديبية اللي يجوز توقيعها على سبيل الحصر ، ونصها “الجزاءات التأديبية التي يجوز توقيعها على العامل وفقا للوائح تنظيم العمل والجزاءات في المنشأة هي”:
| م | الجزاء | الحد |
|---|---|---|
| ١ | الانذار الكتابي | — |
| ٢ | الخصم من الاجر الاساسي | أجر ٥ ايام للمخالفة وفي الشهر (م ١٤٣) |
| ٣ | تأجيل موعد استحقاق العلاوة السنوية | لا يجاوز ٣ اشهر |
| ٤ | الحرمان من جزء من العلاوة السنوية | لا يجاوز نصفها |
| ٥ | تأجيل الترقية عند استحقاقها | لا يزيد على سنة |
| ٦ | خفض الاجر الاساسي | بمقدار علاوة على الاكثر |
| ٧ | الخفض الى وظيفة في الدرجة الادنى مباشرة | دون تخفيض الاجر |
| ٨ | الفصل من الخدمة | بحكم المحكمة العمالية (م ١٤٨) |
خلي بالك. الخصم بيتحسب من الاجر الاساسي مش الشامل ، ولو الخصم متحدد بنسبة يبقى المقصود الاجر الاساسي اليومي (المادة 143). ومينفعش توقع اكتر من جزاء على نفس المخالفة (المادة 140).
الحدود والمواعيد الرقمية للجزاءات
| البند | الحد او المدة | المادة |
|---|---|---|
| بدء التحقيق من اكتشاف المخالفة | ٧ ايام على الاكثر | م ١٤١ |
| اقصى مدة للتحقيق | ٣ اشهر + ٣ اشهر لو ظهرت وقائع جديدة | م ١٤١ |
| توقيع الجزاء بعد انتهاء التحقيق | خلال ٣٠ يوم | م ١٣٨ |
| التحقيق الشفهي مسموح في | الانذار او خصم لا يزيد على يوم | م ١٤١ |
| اقصى خصم عن المخالفة الواحدة | أجر ٥ ايام من الاساسي | م ١٤٣ |
| اقصى اقتطاع للجزاءات في الشهر | أجر ٥ ايام | م ١٤٣ |
| سلطة مدير المنشأة | انذار + خصم لحد ٣ ايام | م ١٤٨ |
| تشديد الجزاء عند التكرار | لو اتكررت خلال سنة من الابلاغ بالسابق | م ١٤٤ |
| الوقف الاحتياطي | لحد ٦٠ يوم بالاجر كامل | م ١٤٥ |
| تظلم العامل من الوقف | خلال ٣ ايام امام قاضي الامور الوقتية | م ١٤٦ |
تعالوا بقا نحسب الخصم بشكل عملي
مثال (1)
موظف اجره الاساسي 6000 جنيه ، اتأخر 40 دقيقة ، واللائحة بتقول خصم ربع يوم لأول مرة. ما قيمة الخصم؟
الاجر اليومي :- 6000 ÷ 30 = 200 ج.
قيمة الخصم :- 200 × 0.25 = 50 ج.
مثال (2)
نفس الموظف اتجازى في نفس الشهر كذا مرة ومجموع ايام الخصم وصل 6 ايام. ايه الحد؟
اقصى اقتطاع في الشهر :- 200 × 5 = 1000 ج.
يعني الشركة ما تقتطعش اكتر من 1000 ج في الشهر ده وفاء للجزاءات (المادة 143) ، والشيت بيطلع لك تنبيه تلقائي في الحالة دي.
ملحوظة ( عدد ايام الشهر اللي بتقسم عليه عشان تطلع الاجر اليومي سياسة شركة ، والمعتاد 30 ، وتقدر تغيره من شيت الاعدادات ).
اجراءات توقيع الجزاء خطوة بخطوة
1. ابلاغ العامل كتابة
مينفعش توقع اي جزاء الا بعد ابلاغ العامل كتابة بالمنسوب اليه (المادة 141).
2. التحقيق خلال 7 ايام
التحقيق يبدأ خلال 7 ايام على الاكثر من اكتشاف المخالفة ، وبتتولاه الشئون القانونية ، ولو مش موجودة شخص من ذوي الخبرة او احد العاملين بشرط ما يقلش مستواه الوظيفي عن مستوى العامل (المادة 142). وللمنظمة النقابية تبعت ممثل يحضر.
3. محضر وسماع الاقوال
سماع اقوال العامل وتحقيق دفاعه واثبات ده في محضر يتحفظ في ملفه. وفي الانذار او الخصم اللي ما يزيدش عن يوم ينفع التحقيق يبقى شفهي ويتكتب مضمونه في قرار الجزاء.
4. قرار مسبب خلال 30 يوم
قرار الجزاء لازم يبقى مسبب ، وما يتوقعش بعد 30 يوم من انتهاء التحقيق (المادة 138) ، ومن السلطة المختصة: مدير المنشأة لحد 3 ايام خصم ، وصاحب العمل او من يفوضه للباقي.
5. قيد الجزاء في السجل
لو الجزاء مالي بيتقيد في سجل الجزاءات باسم العامل واجره وسبب الجزاء وقيمته (المادة 153).
الفصل: امتى وازاي؟
المادة 148 خلت جزاء الفصل من اختصاص المحكمة العمالية المختصة لوحدها ، ومينفعش الا لو العامل ارتكب خطأ جسيم ، ومن امثلة الخطأ الجسيم اللي ذكرتها المادة: انتحال شخصية او تقديم مستندات مزورة ، الخطأ اللي نشأ عنه ضرر جسيم بشرط ابلاغ الجهات المختصة خلال 24 ساعة ، تكرار مخالفة تعليمات السلامة المكتوبة والمعلنة رغم التنبيه كتابة ، افشاء الاسرار اللي سبب ضرر جسيم ، منافسة صاحب العمل في نفس نشاطه ، السكر البين او تعاطي المخدرات اثناء العمل ، والاعتداء على صاحب العمل او المدير العام او الاعتداء الجسيم على احد الرؤساء.
سجل الجزاءات وطريقة التصرف في حصيلة الجزاءات
المادة 153 بتقول: “يجب على صاحب العمل ان يمسك سجلا ورقيا او الكترونيا لقيد الجزاءات المالية الموقعة على العمال ، مع بيان سبب توقيعها واسم العامل ومقدار اجره ، وان يفرد لحصيلتها حسابا خاصا للصرف على عمال المنشأة في الاغراض الاجتماعية والثقافية والرياضية”. ونفس المادة منعت صرف الفلوس دي في الالتزامات اللي في المادة 272 (الخدمات الاجتماعية والثقافية اللي المنشأة اللي فيها 50 عامل فأكثر ملزمة تقدمها من مالها) ، وعند تصفية المنشأة الحصيلة بتتوزع بالتساوي على العمال الموجودين وقت التصفية.
طب والقرار القديم؟ ايام القانون 12 لسنة 2003 كان في قرار 123 لسنة 2003 بينظم لجنة الحصيلة وطريقة الصرف وتوريد جزء منها ، وشرحناه في مقال اموال حصيلة الجزاءات وطريقة التصرف فيها. المادة 11 من مواد اصدار القانون الجديد خلت القرارات القديمة سارية لحد ما يصدر بديل وبشرط ما تتعارضش مع القانون الجديد ، ولحد 28 سبتمبر 2026 ما صدرش قرار جديد مخصوص للحصيلة. عشان كدا قبل ما تورد اي جزء لجهة برا الشركة اتأكد من مديرية العمل التابع ليها.
الأثر العملي: مخالفة المادة 153 (السجل والحساب الخاص) او المادة 137 (لائحة تنظيم العمل) عقوبتها غرامة من 2000 لـ 10000 جنيه وبتتضاعف في العود (المادة 283) ، ومخالفة ضوابط الجزاءات في المواد من 140 لـ 145 غرامتها من 1000 لـ 20000 جنيه وبتتضاعف في العود (المادة 294). السجل مش ورقة شكلية.
شرح شيت سجل الجزاءات
الشيت فيه 4 صفحات: الاعدادات ، سجل الجزاءات ، حساب الحصيلة ، ودليل الاستخدام. ودي اعمدة صفحة السجل:
| العامود | اسم الخلية | المراد منها | ملحوظة |
|---|---|---|---|
| B | تاريخ قرار الجزاء | تاريخ القرار | إدخال يدوي |
| C | الشهر | بيطلع من التاريخ | معادلة لا تحتاج الى اي ادخال يدوي |
| D – F | اسم العامل – الرقم الوظيفي – الادارة | بيانات العامل | إدخال يدوي |
| G | الاجر الاساسي الشهري | اساس حساب الخصم | إدخال يدوي |
| H – J | المخالفة – رقم التكرار – الجزاء | سبب الجزاء ونوعه من القائمة | إدخال يدوي (قوائم منسدلة) |
| K | ايام الخصم | ربع يوم = 0.25 وحد اقصى 5 | إدخال يدوي |
| L – M | الاجر اليومي – قيمة الخصم | الحساب | معادلة لا تحتاج الى اي ادخال يدوي |
| N | ايام خصم العامل في الشهر | مجموع ايام نفس العامل في نفس الشهر | معادلة |
| O | تنبيه | لو عدى 5 ايام في الشهر او المدير وقع اكتر من 3 ايام | معادلة |
| P – Q | الموقّع – رقم القرار | مين وقع الجزاء ورقم القرار او المحضر | إدخال يدوي |
وصفحة “حساب الحصيلة” بتجمع الخصومات من السجل شهر بشهر لوحدها ، وانت تكتب المصروف الاجتماعي والثقافي والرياضي ، وهي تحسب الرصيد في آخر كل شهر وتنبهك لو المصروف عدى الرصيد.
قائمة تنفيذ لمسؤول الموارد البشرية
- عدّل جدول المخالفات في النموذج حسب نشاط شركتك في حدود المادة 139.
- اتأكد إن كل خصم في الجدول ما يعديش أجر 5 ايام.
- ضم لائحة الجزاءات للائحة تنظيم العمل وقدمهم لمديرية العمل للتصديق.
- علّق اللائحة بعد التصديق في مكان ظاهر في الشركة وفروعها.
- فوّض كتابة مين يوقع الجزاءات فوق 3 ايام.
- ابدأ سجل الجزاءات من اول جزاء مالي ، وافتح حساب خاص للحصيلة.
- راجع الشيت آخر كل شهر قبل اعداد المرتبات.
اسئلة شائعة عن لائحة الجزاءات في قانون العمل الجديد
كام اقصى خصم من المرتب كجزاء في قانون العمل الجديد؟
أجر 5 ايام من الاجر الاساسي عن المخالفة الواحدة ، ومينفعش يتقتطع من الاجر اكتر من أجر 5 ايام في الشهر الواحد وفاء للجزاءات (المادة 143).
مين له حق توقيع الجزاء على الموظف؟
مدير المنشأة يوقع الانذار الكتابي والخصم لحد 3 ايام ، وصاحب العمل او من يفوضه يوقع باقي الجزاءات ، والفصل للمحكمة العمالية بس (المادة 148).
هل ينفع اجازي الموظف من غير تحقيق؟
لا. لازم ابلاغ كتابي وتحقيق ، والتحقيق ممكن يبقى شفهي بس في الانذار او الخصم اللي ما يزيدش عن يوم ويتكتب مضمونه في القرار (المادة 141).
فلوس الجزاءات بتروح فين؟
في حساب خاص يتصرف منه على عمال المنشأة في الاغراض الاجتماعية والثقافية والرياضية ، ومينفعش تتصرف في التزامات المادة 272 ، وعند التصفية بتتوزع بالتساوي على العمال (المادة 153).
هل لائحة الجزاءات لازم تتعتمد من مكتب العمل؟
ايوه ، هي جزء من لائحة تنظيم العمل اللي لازم تتسلم للجهة الادارية للتصديق ، ولو ما ردتش خلال 30 يوم تبقى نافذة (المادة 137 وقرار 162 لسنة 2026).
خلاصة
الجزاء في القانون الجديد مش قرار بيتاخد في لحظة غضب ، ده اجراء له مواعيد وسقوف وسلطة محددة وسجل بيتراجع. الشركة اللي عندها لائحة جزاءات واضحة ومعتمدة وسجل مظبوط بتحمي نفسها قبل ما تحاسب موظفيها.
وفي الختام ارجو يكون المقال افاد حضراتكم ولو بجزء بسيط في الشغل.
عايز لائحة جزاءات مفصلة على نشاط شركتك؟
فريق كارييريانز يجهز لك لائحة تنظيم العمل ولائحة الجزاءات على طبيعة نشاطك ، مطابقة لقانون العمل 14 لسنة 2025 وقرار 162 لسنة 2026 ، ويتابع معاك تصديقها.
تابع ايضا:
تحميل قرار لائحة تنظيم العمل وفقا لقانون العمل الجديد رقم 14 لسنة 2025
اموال حصيلة الجزاءات وطريقة التصرف فيها
ملخص قانون العمل الجديد – اهم 20 تغيير على صاحب العمل والشركات
تحميل اللائحة التنفيذية وقرارات وزير العمل لقانون العمل الجديد رقم 14 لسنة 2025
كمان تقدر تتابع قناتنا على اليوتيوب لمزيد من الشروحات: إتعلم Personnel
هذا المقال شرح تحريري للمواد ٤ و١٣٧ إلى ١٤٨ و١٥٣ و٢٨٣ و٢٩٤ من قانون العمل رقم ١٤ لسنة ٢٠٢٥ وقرار وزير العمل رقم ١٦٢ لسنة ٢٠٢٦، ونموذج اللائحة والسجل استرشاديان يُعدَّلان حسب نشاط كل منشأة ويخضعان لتصديق مديرية العمل. النص الرسمي المنشور هو المرجع المُعتد به، ولا يُغني هذا المقال عن الاستشارة القانونية أو المهنية في الحالات الفردية.
