فترة الاختبار والفصل والتعويض في قانون العمل الجديد – شرح كامل بالامثلة
فترة الاختبار والفصل والتعويض في قانون العمل الجديد – شرح كامل بالامثلة
النهارده هنتكلم عن فترة الاختبار والفصل والتعويض في قانون العمل الجديد – شرح كامل بالامثلة ، ودا لأن دي اكتر اسئلة بتوصلنا من اصحاب الشركات في الاستشارات: “ينفع امشي الموظف في فترة الاختبار؟” و”لو فصلته هدفع كام؟”.
في المقالة دي هنعرف مدة فترة الاختبار ، والفرق بين الفصل كجزاء والانهاء بالاخطار ، ومين اللي من حقه يفصل ، والتعويض بيتحسب ازاي بأمثلة بالارقام ، كل ده من نص قانون العمل 14 لسنة 2025.
الاول متفقين إن في قانون العمل الجديد “الفصل” كجزاء تأديبي بقى من اختصاص المحكمة العمالية بس (المادة 148) ، وإن انهاء العقد غير محدد المدة لازم يبقى بمبرر مشروع وكاف واخطار كتابي قبلها بـ 3 شهور. واللي بيخالف ده بيدفع تعويض ما يقلش عن اجر شهرين عن كل سنة.
| فترة الاختبار3 شهور بحد اقصى | مهلة الاخطار3 شهور | جزاء الفصلالمحكمة العمالية | تعويض الانهاء غير المشروعشهرين عن كل سنة |
فترة الاختبار في قانون العمل الجديد
المادة 90 بتقول بالنص: “تحدد فترة الاختبار في عقد العمل لمدة لا تزيد على ثلاثة أشهر. ولا يجوز تعيين العامل تحت الاختبار أكثر من مرة واحدة لدى صاحب عمل واحد.”
يعني ايه عمليا؟
فترة الاختبار لازم تبقى مكتوبة في العقد ، ومدتها ما تزيدش عن 3 شهور ، وما ينفعش تجدد فترة الاختبار لنفس الموظف ولا تعينه تاني تحت الاختبار عندك. والسياسة (مدة اقل من 3 شهور مثلا) بتتحدد في العقد ولائحة الشركة.
انهاء العقد خلال فترة الاختبار
القانون حدد مدة فترة الاختبار بس ، وما حطش اجراء خاص لانهاء العقد خلالها. فاللي بيحكم هو العقد ولائحة تنظيم العمل: اكتب فيهم معايير التقييم وطريقة الانهاء ، ووثّق تقييم الموظف كتابة قبل اي قرار ، عشان لو حصل نزاع يبقى عندك سبب مكتوب.
خلي بالك. المادة 93 بتلزم صاحب العمل اللي نقل العامل من مكان التعاقد لمكان العمل إنه يرجعه خلال 3 ايام من انتهاء العقد “ولو كان خلال فترة الاختبار”. يعني انتهاء العقد في فترة الاختبار ليه آثار زي اي انتهاء.
الفصل كجزاء تأديبي: مين يفصل وامتى؟
المادة 148 خلت “الاختصاص بتوقيع جزاء الفصل من العمل للمحكمة العمالية المختصة” ، وباقي الجزاءات لصاحب العمل او اللي يفوضه ، ومدير المنشأة يوقع الانذار الكتابي والخصم لحد 3 ايام بس. والفصل ما يجوزش الا لو العامل ارتكب خطأ جسيم ، والقانون حدد حالاته:
حالات الخطأ الجسيم اللي تجيز طلب الفصل (المادة 148)
✓ انتحال شخصية غير صحيحة او تقديم مستندات مزورة.
✓ خطأ نشأت عنه اضرار جسيمة ، بشرط ابلاغ الجهات المختصة خلال 24 ساعة من العلم.
✓ تكرار عدم مراعاة تعليمات السلامة المكتوبة والمعلنة رغم التنبيه كتابة.
✓ افشاء اسرار المنشأة وده ادى لاضرار جسيمة.
✓ منافسة صاحب العمل في نفس نشاطه.
✓ حالة سكر بين او تأثير مادة مخدرة اثناء ساعات العمل.
✓ الاعتداء على صاحب العمل او المدير العام ، او اعتداء جسيم على احد الرؤساء اثناء العمل او بسببه.
اسباب ما تنفعش تكون مبرر للانهاء (المادة 165)
✗ انتساب العامل لمنظمة نقابية او مشاركته في نشاط نقابي.
✗ ممارسة صفة المفوض العمالي او السعي لها.
✗ تقديم شكوى او رفع دعوى ضد صاحب العمل.
✗ توقيع الحجز على مستحقات العامل.
✗ استخدام العامل لحقه في الاجازات.
✗ اللون او الجنس او الحالة الاجتماعية او المسئوليات العائلية او الحمل او الدين او الرأي السياسي.
ولو حصل نزاع على الفصل ، اي طرف يقدر خلال 10 ايام من نشوء النزاع يطلب تسوية ودية من لجنة برئاسة مدير مديرية العمل تخلص خلال 21 يوم (المادة 149). ولو ما اتحلش ، المحكمة العمالية بتفصل في طلب الفصل بصفة مستعجلة خلال 3 شهور ، ولو شافت من ظاهر الاوراق إن طلب العامل صحيح بتلزم صاحب العمل يدفعله ما يعادل اجره من تاريخ الفصل بحد اقصى 6 شهور (المادة 150).
انهاء العقد غير محدد المدة بالاخطار
- اي طرف يقدر ينهي العقد بشرط يخطر التاني كتابة قبلها بـ 3 شهور (المادة 156).
- الانهاء لازم يبقى بمبرر مشروع وكاف ، وفي وقت مناسب لظروف العمل (المادة 157).
- ما ينفعش تخطر العامل وهو في اجازة ، والمهلة ما تبدأش الا من اليوم التالي لانتهاء الاجازة ، ولو اخد اجازة مرضية خلال المهلة بتقف (المادة 159).
- العقد بيفضل قايم طول مهلة الاخطار بكل التزاماته (المادة 160) ، ولو الاخطار من صاحب العمل يحق للعامل يغيب يوم في الاسبوع او 8 ساعات للبحث عن شغل بأجر (المادة 162).
- ما ينفعش الاتفاق على الاعفاء من الاخطار او تقليل مدته ، لكن ينفع زيادتها (المادة 161).
- لو صاحب العمل انهى من غير اخطار او قبل المهلة ، يدفع اجر المهلة او الباقي منها وتتحسب ضمن مدة الخدمة (المادة 164).
تعالوا بقا نحسب التعويض
المادة 165 بتقول إن لو صاحب العمل انهى العقد غير محدد المدة لسبب غير مشروع ، العامل له الحق في تعويض “بما لا يقل عن أجر شهرين عن كل سنة من سنوات الخدمة” ، ومن غير ما يخل ده بباقي حقوقه.
مثال (1)
موظف بعقد غير محدد المدة ، اجره 10,000 جنيه ، مدة خدمته 5 سنين ، والشركة انهت عقده لسبب غير مشروع ومن غير اخطار :-
الحد الادنى للتعويض = 10,000 × 2 × 5 = 100,000 جنيه (المادة 165)
ومقابل مهلة الاخطار = 10,000 × 3 = 30,000 جنيه (المادة 164)
ده غير رصيد الاجازات وباقي المستحقات.
الحد الادنى للتعويض عن الانهاء غير المشروع – اجر 10,000 جنيه
الحد الادنى = الاجر × 2 × سنوات الخدمة (المادة 165) – المحكمة ممكن تحكم بأكتر حسب الضرر.
مثال (2) – عقد محدد المدة اكتر من 5 سنين
المادة 154 بتقول إن العقد محدد المدة بينتهي بانقضاء مدته ، ولو العقد اتعمل او اتجدد لمدة اكتر من 5 سنين وكان الانهاء من صاحب العمل ، العامل يستحق مكافأة تعادل اجر شهر عن كل سنة :-
اجر 8,000 × 7 سنين = 56,000 جنيه
الأثر العملي: اغلب القضايا اللي الشركات بتخسرها مش لأن الموظف كان كويس ، لكن لأن الاجراء غلط: فصل من غير محكمة ، او اخطار شفهي ، او اخطار وهو في اجازة. الاجراء الصح اوفر بكتير من التعويض. ولو الطرفين متفقين ، الانهاء بالتراضي باتفاق مكتوب اسلم – شرحناه في مقال نموذج انهاء عقد العمل بالتراضي.
حالات تانية لانتهاء العقد
| الحالة | الحكم | المادة |
|---|---|---|
| وفاة العامل | صرف اجر شهرين لنفقات الجنازة (بحد ادنى 1,000 جنيه) + منحة اجر شهر الوفاة والشهرين التاليين | 169 |
| العجز الكلي | ينتهي العقد ، والعجز الجزئي ما ينهيهوش لو في عمل تاني مناسب | 170 |
| سن الستين | ما ينفعش سن تقاعد اقل من 60 ، ولصاحب العمل الانهاء عند 60 الا لو العقد محدد المدة ممتد بعدها | 171 |
| العمل بعد الستين | مكافأة نص شهر عن كل سنة من اول 5 سنين وشهر عن كل سنة بعدها لو مالوش حقوق تأمينية عن المدة | 172 |
| مرض العامل | ممنوع الانهاء الا بعد استنفاد الاجازات المرضية ومتجمد السنوية ، مع اخطار قبلها بـ 15 يوم | 173 |
| حكم جنائي نهائي | يجوز الانهاء لو حكم بعقوبة جناية او مقيدة للحرية في جريمة ماسة بالشرف او الامانة | 174 |
وفي كل الحالات ، المادة 175 بتلزمك تدي العامل شهادة خبرة خلال 15 يوم من طلبها ، وترجعله اوراقه فور طلبه.
اسئلة شائعة عن فترة الاختبار والفصل والتعويض
كام مدة فترة الاختبار في قانون العمل الجديد؟
ما تزيدش عن 3 شهور ، ومرة واحدة بس لدى نفس صاحب العمل (المادة 90).
ينفع اجدد فترة الاختبار؟
لا ، القانون منع تعيين العامل تحت الاختبار اكتر من مرة عند نفس صاحب العمل.
مين اللي يفصل العامل في القانون الجديد؟
جزاء الفصل من اختصاص المحكمة العمالية المختصة بس (المادة 148).
تعويض الفصل التعسفي كام؟
لا يقل عن اجر شهرين عن كل سنة خدمة في العقد غير محدد المدة (المادة 165) ، غير مقابل مهلة الاخطار لو ما اتخطرش.
هل في مكافأة نهاية خدمة في القطاع الخاص؟
القانون ما قررش مكافأة عامة لكل موظف بيمشي. المكافآت اللي فيه لحالات محددة زي انهاء صاحب العمل لعقد محدد المدة اكتر من 5 سنين (المادة 154) والعمل بعد سن الستين (المادة 172) ، والباقي حسب العقد ولائحة الشركة.
كام مهلة الاخطار قبل انهاء العقد؟
3 شهور كتابة في العقد غير محدد المدة (المادة 156) ، وما ينفعش الاتفاق على تقليلها.
خلاصة
فترة الاختبار 3 شهور بحد اقصى ومرة واحدة ، والفصل كجزاء للمحكمة بس ، والانهاء بمبرر واخطار كتابي 3 شهور. وكل غلطة في الاجراء تمنها تعويض لا يقل عن شهرين عن كل سنة. اكتب كل ده في العقد ولائحة الشركة ، ووثّق التقييم والتحقيق كتابة.
وفي الختام ارجو يكون المقال افاد حضراتكم ولو بجزء بسيط في الشغل.
عندك حالة انهاء خدمة ومحتاج تتأكد من الاجراء؟
فريق كارييريانز يراجع معاك الحالة قبل القرار: العقد والتحقيق والاخطار والمستحقات ، ويحسب لك التكلفة المتوقعة مقابل قانون العمل 14 لسنة 2025.
تابع ايضا:
تحميل نموذج انهاء عقد العمل بالتراضي word وفقا لقانون العمل الجديد
تقديم الاستقالة في مكتب العمل – الاجراءات وحقوق العامل والشركة
تحميل نموذج عقد عمل محدد المدة وغير محدد المدة word وفقا لقانون العمل رقم 14 لسنة 2025
ملخص قانون العمل الجديد – اهم 20 تغيير على صاحب العمل والشركات
كمان تقدر تتابع قناتنا على اليوتيوب لمزيد من الشروحات: إتعلم Personnel
الاحكام والارقام منقولة من نص قانون العمل رقم 14 لسنة 2025 (المواد 90 و93 و148 و149 و150 و154 و156 الى 165 و169 الى 175). الامثلة توضيحية بالحد الادنى، والمحكمة العمالية تقدر التعويض حسب كل حالة. المقال للتوعية وليس بديلا عن الاستشارة القانونية.
