تحميل نماذج اخطار مكتب العمل بالتعيين وانتهاء الخدمة ومواعيدها
تحميل نماذج اخطار مكتب العمل بالتعيين وانتهاء الخدمة ومواعيدها
النهارده هنتكلم عن نماذج اخطار مكتب العمل بالتعيين وانتهاء الخدمة ومواعيدها ، ودا لأن ناس كتير فاكرة إن مكتب العمل بيتعامل معاه وقت الاستقالة بس ، والحقيقة إن قانون العمل 14 لسنة 2025 فيه اكتر من اخطار ليه ميعاد وغرامة.
في المقالة دي جمعنا كل اللي الشركة بتبعته او بتقدمه لمكتب العمل من اول التعيين لحد انتهاء الخدمة ، بميعاد كل واحد وسنده والغرامة ، ومعاهم ملف Word فيه نتيجة المواعيد وخطابات التسليم جاهزة.
الاول متفقين إن النماذج الرسمية للبيانات بتعدها وزارة العمل (المادة 36 بتقول “وفقا للنماذج التي تعدها الوزارة المختصة”) ، فاللي معانا هنا خطابات التسليم ونتيجة المواعيد اللي بتنظم الشغل ، والنموذج الرسمي بتاخده من مكتب العمل التابع ليه.
| بيان المنشأة30 يوم من بدء العمل | شهادة القيد30 / 45 يوم | بيان ينايركل سنة | الاستقالةاعتماد مكتب العمل |
كل اخطارات مكتب العمل في جدول واحد
| الاخطار | الميعاد | المادة | الغرامة |
|---|---|---|---|
| بيان مفصل بالعمال (المؤهل – المهنة – السن – الجنسية – النوع – الاجر) | خلال 30 يوم من بدء العمل بالمنشأة | 36 | 1,000 – 20,000 ج وتتعدد بعدد العمال (286) |
| بيان التعديلات + الوظائف الشاغرة والملغاة + الاحتياجات المتوقعة | خلال شهر يناير كل سنة | 36 | 1,000 – 20,000 ج وتتعدد (286) |
| قيد العامل اللي اتعين من غير شهادة قيد | خلال 30 يوم من استلامه العمل | 33 | 500 – 1,000 ج لكل عامل (290) |
| رد شهادة القيد بعد استيفاء بياناتها | خلال 45 يوم من استلام العمل | 35 | 500 – 1,000 ج لكل عامل (290) |
| نسخة من عقد العمل | مع تحرير العقد | 89 | — |
| سجل وبيان الاشخاص ذوي الاعاقة | حسب قرار الوزير | 37 | 2,000 – 10,000 ج (283) |
| بيانات قواعد بيانات العمالة | خلال 30 يوم من طلبها | 38 | 1,000 – 20,000 ج (286) |
| لائحة تنظيم العمل (10 عمال فأكثر) | خلال 60 يوم | 137 | 2,000 – 10,000 ج (283) |
| الحادث الجسيم / المرض المهني | خلال 24 ساعة | 260 | — |
| احصائية الامراض والحوادث (30 عامل فأكثر) | النصف الاول من يناير ويوليو | 260 | — |
30 يوم
بيان المنشأة
45 يوم
رد شهادة القيد
يناير
بيان التعديلات
24 ساعة
الحادث الجسيم
اولا: اخطارات التعيين
شهادة القيد (المادتين 33 و35)
ما ينفعش تشغل عامل الا لو معاه شهادة القيد من مكتب العمل ، او تقيده خلال 30 يوم من استلامه العمل. وبعد ما تستوفي بيانات الشهادة ترجعها لمكتب العمل خلال 45 يوم ، وتكتب رقمها وتاريخها قدام اسم العامل في سجل قيد العمال بالمنشأة.
نسخة العقد (المادة 89)
عقد العمل بيتحرر بالعربي من 4 نسخ ، والنسخة الرابعة بتتودع في مكتب العمل. النماذج في مقال نموذج عقد عمل محدد المدة وغير محدد المدة.
بيان المنشأة (المادة 36)
خلال 30 يوم من بدء العمل بالمنشأة ، بيان مفصل بعدد العمال حسب مؤهلاتهم ومهنهم وفئات اعمارهم وجنسياتهم ونوعهم والاجور.
ثانيا: الاخطار السنوي في يناير
المادة 36 بتلزم المنشأة خلال شهر يناير من كل سنة تبعت لمكتب العمل: التعديلات اللي حصلت على بيان العمال ، وعدد الوظائف الشاغرة بسبب الاحلال او التوسعات والوظائف اللي اتلغت ، وتقدير الاحتياجات المتوقعة للسنة الجاية حسب الحالة التعليمية والمهنية. ومكتب العمل بيبعت نسخة من البيانات دي للهيئة القومية للتأمين الاجتماعي.
خلي بالك. بيان يناير هو المكان اللي بتظهر فيه حركة الخروج خلال السنة (اللي استقالوا او اتنهت خدمتهم). عشان كدا خلي سجل الحركة جاهز من اول السنة ، والملف اللي مع المقال فيه جدول بيان يناير.
ثالثا: عند انتهاء الخدمة
القانون ما حطش “نموذج اخطار بانتهاء الخدمة” مستقل لمكتب العمل بميعاد خاص ، لكن مكتب العمل داخل في انتهاء الخدمة في الحالات دي:
- الاستقالة: لازم تبقى معتمدة من مكتب علاقات العمل (المادة 167 وقرار 187 لسنة 2025) ، والعامل هو اللي بيقدمها مش الشركة. التفاصيل في مقال تقديم الاستقالة في مكتب العمل.
- النزاع على الفصل: طلب التسوية الودية بيتقدم للجنة برئاسة مدير مديرية العمل خلال 10 ايام من النزاع (المادة 149).
- بيان يناير: بيظهر فيه التعديلات على عدد العمال خلال السنة (المادة 36).
ومع التأمينات: نموذج 6 خلال اسبوع من انتهاء الخدمة.
الأثر العملي: الغرامات في اغلب الاخطارات دي بتتعدد بعدد العمال. شركة فيها 30 موظف ونسيت بيان المادة 36 ممكن تتعرض لغرامة من 30,000 لـ 600,000 جنيه نظريا. الاخطار ورقة واحدة ، والغرامة ممكن تبقى ميزانية سنة تدريب.
اسئلة شائعة عن اخطار مكتب العمل
امتى اخطر مكتب العمل بالتعيين؟
بيان المنشأة خلال 30 يوم من بدء العمل ، وقيد العامل اللي من غير شهادة قيد خلال 30 يوم من استلامه ، ورد شهادة القيد خلال 45 يوم.
هل في نموذج رسمي لاخطار مكتب العمل؟
ايوه ، بيانات المادة 36 بتتعمل على النماذج اللي بتعدها الوزارة ، وبتاخدها من مكتب العمل التابع ليه. الملف اللي مع المقال فيه خطابات التسليم ونتيجة المواعيد.
هل لازم اخطر مكتب العمل لما موظف يمشي؟
الاستقالة نفسها لازم تتعتمد من مكتب العمل ، والتعديلات على عدد العمال بتتبعت في بيان يناير. ومع التأمينات نموذج 6 خلال اسبوع.
ايه غرامة عدم ارسال بيان المنشأة لمكتب العمل؟
من 1,000 لـ 20,000 جنيه وتتعدد بعدد العمال وتتضاعف في العود (المادة 286).
خلاصة
مكتب العمل مش بس للاستقالة: بيان المنشأة خلال 30 يوم ، شهادات القيد خلال 30 و45 يوم ، نسخة العقد ، بيان يناير كل سنة ، ولائحة تنظيم العمل لو 10 عمال فأكثر. حط المواعيد دي في نتيجة الشركة وخلي نسخة الوارد في الملف.
وفي الختام ارجو يكون المقال افاد حضراتكم ولو بجزء بسيط في الشغل.
عايز حد يمسك ملف شركتك في مكتب العمل؟
فريق كارييريانز بيجهز ويقدم بيانات مكتب العمل وشهادات القيد وبيان يناير ولائحة تنظيم العمل ، ويتابع معاك المواعيد طول السنة.
تابع ايضا:
اول 10 خطوات HR لازم اي شركة جديدة تعملها قانونيا
لائحة تنظيم العمل – اسئلة شائعة: مين ملزم؟ ايه العقوبة؟
تقديم الاستقالة في مكتب العمل – الاجراءات وحقوق العامل والشركة
مستندات ملف العامل ومسوغات التعيين
كمان تقدر تتابع قناتنا على اليوتيوب لمزيد من الشروحات: إتعلم Personnel
المواعيد والغرامات منقولة من نص قانون العمل رقم 14 لسنة 2025 (المواد 33 و35 و36 و37 و38 و89 و137 و149 و167 و260 و283 و286 و290) وقرار وزير العمل رقم 187 لسنة 2025. الملف أداة تنظيم داخلية وليس بديلا عن النماذج الرسمية، وتعليمات مديرية العمل المختصة هي المرجع.
