لائحة تنظيم العمل – اسئلة شائعة: مين ملزم؟ ايه العقوبة؟ وازاي تعتمدها من مكتب العمل
لائحة تنظيم العمل – اسئلة شائعة: مين ملزم؟ ايه العقوبة؟ وازاي تعتمدها من مكتب العمل
النهارده هنتكلم عن لائحة تنظيم العمل – اسئلة شائعة: مين ملزم؟ ايه العقوبة؟ وازاي تعتمدها من مكتب العمل ، ودا لأن من ساعة ما صدر قرار 162 لسنة 2026 واغلب الاسئلة اللي بتوصلنا من اصحاب الشركات ومسئولي شئون العاملين بتدور حوالين نفس النقط.
فجمعنا في المقالة دي اكتر الاسئلة تكرارا ، وجاوبنا عليها من نص المادة 137 من قانون العمل 14 لسنة 2025 ومن قرار 162 لسنة 2026 ، ومعاهم مسار الاعتماد من مكتب العمل يوم بيوم.
الاول متفقين إن اللائحة مش ورقة بتتحط في درج ، دي الوثيقة اللي بتحكم بيها في اي خلاف جوا الشركة: ترقية ، نقل ، اجر ، اجازة ، جزاء. ولو مش موجودة او مش معتمدة ، الشركة بتبقى مخالفة ومن غير سند وقت الخلاف.
| السندالمادة 137 – قانون 14/2025 | مين ملزم10 عمال فأكثر | ميعاد الاعداد60 يوم | الغرامة2,000 – 10,000 جنيه |
مين الملزم بعمل لائحة تنظيم العمل؟
المادة 137 من قانون العمل بتقول بالنص: “على كل صاحب عمل يستخدم عشرة عمال فأكثر أن يعد لائحة بقواعد تنظيم العمل وفقا لطبيعة النشاط”. يعني المعيار عدد العمال مش شكل الشركة ، فالشركة المساهمة زي ذات المسئولية المحدودة زي المنشأة الفردية ، طالما عندك 10 عمال فأكثر يبقى لازم لائحة.
خلي بالك. قرار 162 لسنة 2026 (المادة 11) بيطبق اللائحة على كل العاملين في المنشأة وفروعها ومواقع عملها ، ايا كانت طبيعة او مدة علاقة العمل او نمط اداءه. يعني اللي شغال من البيت ، واللي بعقد مؤقت ، واللي في فرع تاني ، كلهم داخلين في نطاق اللائحة.
امتى لازم تكون اللائحة جاهزة؟
المادة 137 ادت صاحب العمل ستين يوم لاعداد اللائحة ، والستين يوم دول بيتحسبوا من واحد من التلات تواريخ دول حسب الحالة:
- تاريخ بداية عمل المنشأة (لو شركة جديدة عندها 10 عمال من الاول).
- تاريخ توافر النصاب (يعني اليوم اللي وصلت فيه لعشرة عمال).
- تاريخ نفاذ القانون (القانون اتنشر 3 مايو 2025 واتعمل بيه من اول سبتمبر 2025 – المادة 13 من مواد الاصدار).
ايه العقوبة لو الشركة ما عملتش اللائحة؟
المادة 283 من القانون بتعاقب اللي يخالف حكم المادة 137 بغرامة لا تقل عن الفين جنيه ولا تزيد على عشرة الاف جنيه ، وتتضاعف الغرامة في حالة العود.
الأثر العملي: الغرامة مش هي المشكلة الكبيرة. المشكلة الحقيقية إن الشركة اللي من غير لائحة معتمدة بتبقى من غير سند وقت الجزاء او الترقية او النقل ، واي قرار ممكن يتطعن عليه. وكمان لائحة الجزاءات جزء من اللائحة – شرحناها في مقال تحميل لائحة الجزاءات وسجل الجزاءات.
ازاي تعتمد لائحة تنظيم العمل من مكتب العمل؟
الطلب بيتقدم لمديرية العمل المختصة (مكتب علاقات العمل) من صاحب العمل او الممثل القانوني للمنشأة ، وده المسار زي ما رتبته المواد 7 و8 و9 من قرار 162 لسنة 2026:
يوم التقديم
تقديم الملف
ما يثبت صفة مقدم الطلب وبطاقته ، صورة السجل التجاري والبطاقة الضريبية والرقم التأميني للمنشأة ، تلات نسخ من مشروع اللائحة موقعة ومختومة على كل صفحة ، وصورة اللائحة السارية لو في.
نفس اليوم
ايصال الاستلام
المديرية بتدي ايصال رسمي فيه عدد الصفحات وتاريخ التقديم ، ومنه بتبدأ كل المدد. احتفظ بيه.
خلال 3 ايام عمل
ارسال نسخة للنقابة
المديرية بتبعت نسخة للمنظمة النقابية المختصة او المفوض العمالي.
خلال 15 يوم
رأي النقابة
لو النقابة ما ردتش كتابة خلال 15 يوم من تسلمها ، ده بيعتبر موافقة.
لو في اعتراض
التصحيح خلال 5 ايام عمل
لو المديرية اعترضت كتابة باعتراض مسبب ، الشركة تعالج اسباب الاعتراض خلال خمس ايام عمل على الاكثر.
بعد 30 يوم
النفاذ
لو المديرية ما صدقتش ولا اعترضت خلال 30 يوم من الاستلام ، اللائحة بتبقى نافذة من اليوم التالي.
وبعد الاعتماد ، المادة 137 بتلزم صاحب العمل يعلق اللائحة في مكان ظاهر في المنشأة وفروعها ومواقع عملها.
اسئلة شائعة عن لائحة تنظيم العمل
هل الشركة اللي عندها اقل من 10 عمال ملزمة بلائحة؟
المادة 137 بتلزم اللي عنده 10 عمال فأكثر. لكن لو الشركة اقل من كدا واتعملت لائحة داخلية فده احسن تنظيميا ، ولما العدد يوصل 10 بتبدأ الستين يوم من تاريخ توافر النصاب.
هل ينفع انقل لائحة شركة تانية زي ما هي؟
لا ، المادة 137 بتقول “وفقا لطبيعة النشاط” ، وقرار 162 بيطلب 15 بند الزامي لازم يتكتبوا على واقع شركتك. اللائحة المنقولة غالبا هيتعمل عليها اعتراض.
ايه البنود اللي لازم تبقى في اللائحة؟
المادة 2 من قرار 162 حددت 15 بند على الاخص ، منهم: الاعلان عن الوظائف والاختيار ، التدريب ، عقود العمل ، ملف خدمة العامل ، تقييم الاداء ، الترقي ، النقل والندب ، حماية الاجور ، ساعات العمل والاضافي ، الاجازات ، السلامة ، انتهاء علاقة العمل ، التحقيق ، والمخالفات والجزاءات. القائمة كاملة في مقال تحميل قرار لائحة تنظيم العمل.
هل لازم اكتب المزايا اللي بديها للموظفين من غير نص مكتوب؟
ايوه ، المادة 3 من قرار 162 بتقول إن اللائحة لازم تتضمن كل المزايا المطبقة فعليا ، حتى اللي استقرت عليها الممارسة من غير نص. واي انتقاص منها سبب للاعتراض.
لو مكتب العمل ما ردش ، اعمل ايه؟
لو عدت 30 يوم من تاريخ الاستلام من غير تصديق ولا اعتراض ، اللائحة بتبقى نافذة من اليوم التالي. عشان كدا ايصال الاستلام المختوم هو اهم ورقة في الملف.
هل تغيير ملكية الشركة بيلغي اللائحة؟
لا ، المادة 12 من قرار 162 بتقول إن الادماج او التقسيم او انتقال الملكية ما بيوقفش سريان اللائحة ، والخلف مسئول بالتضامن مع صاحب العمل السابق.
ايه غرامة عدم عمل اللائحة؟
من 2,000 لـ 10,000 جنيه ، وبتتضاعف في حالة العود (المادة 283).
خلاصة
لو عندك 10 عمال فأكثر: اكتب لائحة على مقاس نشاطك ، دوّن فيها كل المزايا الموجودة فعلا ، قدمها لمكتب العمل وخد ايصال مختوم ، وعلقها بعد الاعتماد. وده كله لازم يتعمل خلال 60 يوم من تاريخ الالتزام.
وفي الختام ارجو يكون المقال افاد حضراتكم ولو بجزء بسيط في الشغل.
عايز لائحة تنظيم عمل معتمدة على مقاس شركتك؟
فريق كارييريانز بيجهز لائحة تنظيم العمل ولائحة الجزاءات على طبيعة نشاطك ، مطابقة لقانون العمل 14 لسنة 2025 وقرار 162 لسنة 2026 ، ويتابع معاك تقديمها واعتمادها من مكتب العمل.
تابع ايضا:
تحميل قرار لائحة تنظيم العمل وفقا لقانون العمل الجديد رقم 14 لسنة 2025
تحميل لائحة الجزاءات وسجل الجزاءات وفقا لقانون العمل الجديد
ملخص قانون العمل الجديد – اهم 20 تغيير على صاحب العمل والشركات
تحميل نماذج اخطار مكتب العمل بالتعيين وانتهاء الخدمة ومواعيدها
كمان تقدر تتابع قناتنا على اليوتيوب لمزيد من الشروحات: إتعلم Personnel
الاحكام منقولة من نص قانون العمل رقم 14 لسنة 2025 (المواد 137 و283 والمادة 13 من مواد الاصدار) ومن قرار وزير العمل رقم 162 لسنة 2026. المقال للتوعية وليس بديلا عن الاستشارة القانونية، وتعليمات مديرية العمل المختصة هي المرجع عند التطبيق.
