اول 10 خطوات HR لازم اي شركة جديدة تعملها قانونيا

1. سجّل المنشأة في التأمينات الاجتماعية

قبل ما تأمن على اي موظف لازم المنشأة نفسها يبقى ليها رقم تأميني في مكتب التأمينات اللي في دائرته النشاط. ده بيتعمل بطلب اشتراك منشأة ومعاه السجل التجاري والبطاقة الضريبية وبيانات المدير المسئول ونموذج التوقيع.

2. ابعت بيان المنشأة لمكتب العمل خلال 30 يوم

المادة 36 بتلزم كل منشأة تبعت للجهة الادارية خلال ثلاثين يوم من تاريخ بدء العمل بيان مفصل بعدد العمال حسب مؤهلاتهم ومهنهم واعمارهم وجنسياتهم ونوعهم واجورهم ، على النماذج اللي بتعدها الوزارة.

3. شهادة القيد لكل موظف

المادة 33 بتقول ما ينفعش تشغل عامل الا لو معاه شهادة القيد من مكتب العمل ، او تقيده خلال 30 يوم من استلامه العمل. والمادة 35 بتلزمك ترجع شهادة القيد لمكتب العمل خلال 45 يوم بعد ما تستوفي بياناتها ، وتكتب رقمها وتاريخها قدام اسم العامل في سجل قيد العمال.

4. عقد عمل مكتوب لكل موظف

المادة 89 بتلزمك تكتب العقد بالعربي من 4 نسخ: نسخة ليك ، ونسخة للعامل ، ونسخة لمكتب التأمينات ، ونسخة لمكتب العمل. وفترة الاختبار ما تزيدش عن 3 شهور ومرة واحدة بس (المادة 90). النماذج جاهزة في مقال نموذج عقد عمل محدد المدة وغير محدد المدة.

5. ملف لكل موظف

المادة 92 بتلزمك تعمل ملف ورقي او الكتروني لكل عامل فيه بياناته وعقده واجازاته وجزاءاته وما يفيد التأمين عليه والكشف الطبي الابتدائي ، وتحتفظ بيه 5 سنين على الاقل بعد انتهاء الخدمة.

6. س1 لكل موظف خلال اسبوعين

التأمين على الموظف الجديد بيتقدم لمكتب التأمينات خلال اسبوعين من تاريخ التحاقه. الخطوات والمستندات في مقال شرح استمارة 1 واستمارة 6 تأمينات.

7. نظام اجور موثق

المادة 115 بتقول إن ذمة صاحب العمل ما تبرأش من الاجر الا بتوقيع العامل على الاستلام في السجل او كشوف الاجور او بتحويل الاجر لحسابه في البنك ، ولازم تدي العامل بيان بمفردات اجره. ومعاه حجز ضريبة كسب العمل وتوريدها – شرحناها في مقال طريقة حساب ضريبة كسب العمل.

8. ساعات العمل والاضافي والاجازات

حدد ساعات الشركة الرسمية وسياسة الاضافي والاجازات في حدود القانون ، واكتبها في العقد واللائحة. التفاصيل في مقال طريقة حساب اجر الاضافي وساعات العمل.

9. لائحة تنظيم العمل وسجل الجزاءات

لو وصلت 10 عمال فأكثر لازم لائحة خلال 60 يوم وتتقدم لمكتب العمل للاعتماد (المادة 137) ، ولازم سجل للجزاءات المالية وحساب خاص لحصيلتها (المادة 153). الاسئلة الشائعة في مقال لائحة تنظيم العمل – اسئلة شائعة.

10. السلامة والصحة المهنية

المادة 260 بتلزم المنشأة تخطر الجهة الادارية بأي حادث جسيم او ظهور اعراض مرض مهني خلال 24 ساعة ، ولو عندك 30 عامل فأكثر تبعت احصائية نصف سنوية في النصف الاول من شهري يناير ويوليو.

خلي بالك. المادة 36 كمان بتطلب منك كل شهر يناير تبعت لمكتب العمل التعديلات اللي حصلت على بيان العمال ، والوظايف الشاغرة واللي اتلغت ، وتقدير احتياجاتك للسنة الجاية. حطها في نتيجة الشركة من دلوقتي.

قائمة متابعة HR – شركة ……………… – تاريخ بدء النشاط: / / 20

الأثر العملي: الغرامات في الخطوات دي بتتعدد بعدد العمال في اغلب الحالات. مثلا مخالفة المادة 36 (بيان مكتب العمل) غرامتها من 1,000 لـ 20,000 جنيه وبتتعدد بعدد العمال (المادة 286) ، ومخالفة المادتين 33 و35 (شهادة القيد) من 500 لـ 1,000 جنيه لكل عامل (المادة 290). يعني شركة فيها 20 موظف ممكن غرامة ورقة واحدة تبقى رقم كبير.

شركتك جديدة وعايز شئون العاملين تبدأ صح؟

فريق كارييريانز بيجهز لك ملف شئون العاملين كامل: التسجيل في التأمينات ومكتب العمل ، العقود ، ملفات الموظفين ، والسياسات ، ويسلمك نظام تكمل عليه.

اطلب تأسيس شئون العاملين