تحميل نماذج سجلات ودفاتر شئون العاملين المطلوبة وفقا لقانون العمل الجديد
تحميل نماذج سجلات ودفاتر شئون العاملين المطلوبة وفقا لقانون العمل الجديد
النهارده هنتكلم عن سجلات ودفاتر شئون العاملين المطلوبة في قانون العمل الجديد ، ودا لأن اول حاجة بيطلبها اي تفتيش هي “السجلات” ، وكتير من الشركات عندها شيتات متفرقة مش مطابقة للي القانون بيطلبه بالاسم.
في المقالة دي هنعرف كل سجل مطلوب ، وسنده في القانون ، وبيتحدث امتى ، ومعاها ملف Word فيه نموذج لكل سجل تقدر تطبعه او تحوله لشيت.
الاول متفقين إن القانون الجديد بيسمح إن كل السجلات تبقى “ورقية او الكترونية”. يعني مش لازم دفاتر مختومة ، المهم يكون السجل موجود وكامل ويتقدم وقت الطلب.
| عدد السجلات8 اساسية | الشكلورقي او الكتروني | الحفظ5 سنين لملف العامل | الملفWord |
السجلات المطلوبة وسندها
| السجل | بيتسجل فيه ايه | بيتحدث امتى | السند |
|---|---|---|---|
| سجل قيد العمال | اسم كل عامل ورقم وتاريخ شهادة القيد | عند كل تعيين (خلال 45 يوم) | م 33 و35 |
| ملف العامل | البيانات والعقد والكشف الطبي والتأمين والجزاءات والاجازات | طول الخدمة + 5 سنين بعدها | م 92 |
| سجل الاجور | بيانات العاملين والاجر المستحق لكل عامل | كل شهر | م 105 |
| كشوف صرف الاجور | توقيع العامل بالاستلام او اثبات التحويل البنكي | كل صرف | م 115 |
| سجل الجزاءات المالية | الجزاء وسببه واسم العامل واجره ، وحساب خاص للحصيلة | عند كل جزاء | م 153 |
| جدول ساعات العمل والراحة | يوم الراحة وساعات العمل وفترات الراحة | عند اي تعديل (نسخة للجهة الادارية خلال 7 ايام) | م 122 |
| احصائية الامراض والحوادث والاصابات | بيانات الامراض العادية والمزمنة والحوادث الجسيمة والاصابات (للمنشآت 30 عامل فأكثر) ، واخطار اي حادث جسيم او مرض مهني خلال 24 ساعة | نصف سنوية: النص الاول من يوليو ويناير | م 260 |
| بيان المنشأة وبيان يناير | العمال بالمؤهل والمهنة والسن والجنسية والنوع والاجر ، والتعديلات والوظائف الشاغرة والاحتياجات | خلال 30 يوم من البداية ، وكل يناير | م 36 |
خلي بالك. سجل الاجازات وسجل الحضور مش مذكورين بالاسم كسجل مستقل ، لكن الاجازات جزء من ملف العامل (المادة 92) ، والحضور هو اثباتك في اي نزاع عن الاضافي او الغياب. عشان كدا النماذج المرفقة فيها سجل اجازات وسجل حضور كمان.
نظّم السجلات في 4 خطوات
1
جرد
اعمل قايمة بالسجلات الـ 8 وعلّم الموجود والناقص.
2
شكل واحد
اختار ورقي او الكتروني لكل سجل ، والتزم بيه.
3
مسئول
حدد مين بيحدّث كل سجل ومتى.
4
مراجعة شهرية
قبل صرف المرتبات راجع سجل الاجور والجزاءات والاجازات.
الأثر العملي: حصيلة الجزاءات المالية مش ايراد للشركة ، القانون بيلزمك تحطها في حساب خاص وتصرفها على العمال في اغراض اجتماعية وثقافية ورياضية (المادة 153). شركات كتير بتخصم الجزاء وتسيبه في الحسابات العامة ، ودي مخالفة.
اسئلة شائعة عن سجلات شئون العاملين
ايه السجلات المطلوبة في قانون العمل الجديد؟
سجل قيد العمال ، ملف لكل عامل ، سجل الاجور وكشوف الصرف ، سجل الجزاءات المالية ، جدول ساعات العمل ، سجلات السلامة ، وبيان المنشأة وبيان يناير.
هل السجلات لازم تكون دفاتر ورقية؟
لأ ، القانون بيقول ورقي او الكتروني.
ايه بيان يناير لمكتب العمل؟
بيان بالتعديلات على بيانات العمال والوظائف الشاغرة والملغاة والاحتياجات المتوقعة للسنة الجاية ، بيتبعت خلال يناير من كل سنة (المادة 36).
اعمل ايه بحصيلة الجزاءات؟
حساب خاص بيتصرف منه على العمال في اغراض اجتماعية وثقافية ورياضية (المادة 153).
خلاصة
8 سجلات ليها سند في القانون ، ورقي او الكتروني ، وكل واحد ليه مسئول وموعد تحديث. ابدأ بسجل قيد العمال والاجور والجزاءات لأنهم اول حاجة في التفتيش.
وفي الختام ارجو يكون المقال افاد حضراتكم ولو بجزء بسيط في الشغل.
عايز تنظم سجلات شئون العاملين في شركتك؟
فريق كارييريانز بيجهز سجلات شئون العاملين كاملة ورقي او Excel ، وبيدرب فريقك على تحديثها.
تابع ايضا:
تفتيش مكتب العمل والتأمينات على الشركات
تحميل ملف مسوغات التعيين للقطاع الخاص
تحميل لائحة الجزاءات وسجل الجزاءات
تحميل نماذج اخطار مكتب العمل بالتعيين وانتهاء الخدمة
كمان تقدر تتابع قناتنا على اليوتيوب لمزيد من الشروحات: إتعلم Personnel
السجلات منقولة من قانون العمل رقم 14 لسنة 2025 (المواد 33 و35 و36 و92 و105 و115 و122 و153 و260) ، والابلاغ عن الاصابات من المادة 61 من قانون التأمينات 148 لسنة 2019. النماذج استرشادية.
