تحميل شيت حساب التسوية السنوية لضريبة كسب العمل – الدخل 2026
تحميل شيت حساب التسوية السنوية لضريبة كسب العمل – الدخل 2026
النهارده هنتكلم عن التسوية السنوية لضريبة كسب العمل عن دخل سنة 2026 ، ودا لأن الضريبة اللي بتتخصم كل شهر بتتحسب على المرتب الشهري ، لكن الضريبة الحقيقية بتتحسب على دخل السنة كلها. والفرق بينهم بيظهر في التسوية.
في المقالة دي هنعرف يعني ايه تسوية سنوية ، وامتى بتطلع فروق ، ومثال بالارقام لموظف خد مكافأة في ديسمبر ، ومعاها شيت Excel جديد للدخل 2026 بيحسب الضريبة المستحقة والفرق لكل موظف.
الاول متفقين إن التسوية السنوية هي مقارنة بين الضريبة المستحقة على اجمالي دخل الموظف في السنة ، والضريبة اللي اتخصمت منه فعلا شهر بشهر. لو المخصوم اقل يبقى في فرق مستحق ، ولو اكتر يبقى في زيادة ترجع للموظف.
| سنة الدخل1 يناير – 31 ديسمبر 2026 | الشرائحالقانون 7 لسنة 2024 | الاعفاء الشخصي20,000 جنيه | الملفExcel |
امتى بتطلع فروق في التسوية؟
| السبب | ليه بيعمل فرق |
|---|---|
| مكافأة او منحة في شهر واحد | الضريبة الشهرية اتحسبت على مرتب عادي ، والمكافأة رفعت الدخل السنوي لشريحة اعلى |
| زيادة في المرتب في نص السنة | الشهور الاولى اتحسبت على مرتب اقل |
| موظف اتعين او ساب في نص السنة | الدخل السنوي الفعلي مختلف عن المرتب × 12 |
| اعفاءات اتقدمت متأخر | زي اقساط التأمين على الحياة اللي الموظف قدم ما يثبتها في آخر السنة |
| اضافي متغير | الاضافي بيختلف من شهر للتاني |
تعالوا بقا نحسب
مثال
موظف مرتبه الشهري 15,000 جنيه طول 2026 ، واجر اشتراكه التأميني 15,000 ، وخد مكافأة 30,000 جنيه في ديسمبر ، والشركة حسبت الضريبة الشهرية على الـ 15,000 بس :-
اجمالي الدخل الخاضع = 15,000 × 12 + 30,000 = 210,000 جنيه
التأمينات = 15,000 × 11% × 12 = 19,800 جنيه
الوعاء = 210,000 – 19,800 – 20,000 = 170,200 جنيه
الضريبة المستحقة = 1,500 + 2,250 + ( 100,200 × 20% ) = 23,790 جنيه
الضريبة المخصومة خلال السنة = 17,790 جنيه
الفرق المستحق = 6,000 جنيه
الضريبة المستحقة مقابل المخصومة – المثال (جنيه)
الفرق = 30,000 مكافأة × 20% ، لأن المكافأة كلها وقعت في شريحة الـ 20%.
خلي بالك. الحل الصح إن الشركة تحسب ضريبة المكافأة في نفس الشهر على الدخل السنوي المتوقع ، مش تستنى التسوية. والشيت بيكشف الفروق دي لكل الموظفين مرة واحدة.
ازاي تستخدم الشيت
1
الاعدادات
اسم المنشأة وسنة الدخل والاعفاء الشخصي.
2
التسوية
لكل موظف: عدد الشهور ، اجمالي الدخل الخاضع ، تأمينات السنة ، الاعفاءات التانية ، والضريبة المخصومة.
3
النتيجة
الشيت بيحسب الوعاء والضريبة المستحقة بالشرائح والفرق ، ويقولك مستحق على الموظف ولا يرجعله.
4
الشرائح
جدول الشرائح وحالات الدخل اللي يعدي 600,000 للمراجعة.
الأثر العملي: لو الفرق مستحق على الموظف وما اتسواش ، الشركة هي اللي بتتحاسب عليه لأنها جهة الخصم. ولو في زيادة اتخصمت ، الموظف من حقه يرجعله الفرق. عشان كدا التسوية بتتعمل اول السنة لكل الموظفين مش للي سابوا بس.
اسئلة شائعة عن التسوية السنوية لضريبة كسب العمل
يعني ايه التسوية السنوية لضريبة كسب العمل؟
مقارنة الضريبة المستحقة على دخل الموظف في السنة كلها بالضريبة اللي اتخصمت منه شهريا ، وتسوية الفرق.
ايه شرائح ضريبة المرتبات المستخدمة في الشيت؟
شرائح القانون 7 لسنة 2024: اول 40,000 معفاة ، وبعدها 10% و15% و20% و22.5% و25% و27.5% ، مع حالات خاصة للوعاء اللي يعدي 600,000.
هل الشيت بيحسب اكتر من موظف؟
ايوه ، لحد 200 موظف في شيت التسوية.
فين شيت الدخل 2025؟
موجود في مقال تحميل شيت حساب التسوية السنوية لضريبة كسب العمل – الدخل 2025.
خلاصة
التسوية = ضريبة السنة كلها ناقص اللي اتخصم. اكبر اسباب الفروق: المكافآت والزيادات والتعيين او الاستقالة في نص السنة. اعمل التسوية لكل الموظفين في يناير ، وراجع النتيجة مع محاسبك.
وفي الختام ارجو يكون المقال افاد حضراتكم ولو بجزء بسيط في الشغل.
عايز حد يعمل التسوية السنوية لشركتك؟
فريق كارييريانز بيعمل التسوية السنوية لضريبة كسب العمل لكل الموظفين ، ويراجع الفروق ويطابقها مع المرتبات والتأمينات.
تابع ايضا:
طريقة حساب ضريبة كسب العمل على المرتبات – الشرائح والمعادلة بمثال عملي
البدلات المعفاة والاشتراكات المخصومة – طريقة حساب الوعاء الضريبي للمرتب
تحميل شيت حساب التسوية السنوية لضريبة كسب العمل – الدخل 2025
تحميل شيت حساب المرتبات الشهري الكامل excel
كمان تقدر تتابع قناتنا على اليوتيوب لمزيد من الشروحات: إتعلم Personnel
الشرائح والاعفاء الشخصي من قانون الضريبة على الدخل رقم 91 لسنة 2005 المعدل بالقانون 7 لسنة 2024 ، وحصة العامل في التأمينات من القانون 148 لسنة 2019. المثال توضيحي ، والشيت اداة مراجعة داخلية ، وتعليمات مصلحة الضرائب المصرية هي المرجع.
