نسب التأمينات 2027 – الزيادة الجديدة على العامل وصاحب العمل مع حاسبة excel
نسب التأمينات 2027 – الزيادة الجديدة على العامل وصاحب العمل مع حاسبة excel
النهارده هنتكلم عن نسب التأمينات الجديدة اللي هتبدأ من اول يناير 2027 ، ودا لأن دي اول مرة من ساعة ما قانون التأمينات 148 لسنة 2019 اتطبق النسب نفسها تزيد ، مش بس الحد الادنى والاقصى.
في المقالة دي هنعرف ايه اللي اتغير بالظبط في كل نوع تأمين والمادة اللي بتقوله ، والزيادة على مرتب الموظف وعلى تكلفة الشركة بالارقام ، والمطلوب منك تعمله قبل يناير ، ومعاها حاسبة excel تطلعلك الفرق لكل موظفينك.
الاول متفقين إن من اول يناير 2027 حصة العامل في التأمينات هتبقى 11.5% بدل 11% ، وحصة صاحب العمل 19.25% بدل 18.75%. الزيادة كلها في تأمين الشيخوخة والعجز والوفاة: 1% بتتقسم نص للعامل ونص لصاحب العمل ، وباقي انواع التأمين زي ما هي.
| حصة العامل 202711.5% | حصة صاحب العمل 202719.25% | الحد الادنى 20273,200 | الحد الاقصى 202719,300 |
ايه اللي اتغير بالظبط؟
المادة 19 من قانون التأمينات الاجتماعية والمعاشات 148 لسنة 2019 حددت اشتراك تأمين الشيخوخة والعجز والوفاة بـ 12% على صاحب العمل و9% على العامل ، وقالت إن النسبة دي بتزيد 1% كل سبع سنين من تاريخ العمل بالقانون ، وبتتقسم مناصفة بين صاحب العمل والعامل ، بشرط إن اجمالي نسبة الاشتراكات ما تعديش 26%.
القانون اتطبق من اول يناير 2020 ، يعني اول زيادة بتيجي في اول يناير 2027: كل طرف بيزيد نص في المية بس. والزيادة اللي بعدها المفروض تكون في يناير 2034 بنفس الطريقة.
| نوع التأمين | حصة صاحب العمل 2027 | حصة العامل 2027 | المادة |
|---|---|---|---|
| الشيخوخة والعجز والوفاة | 12.5% (+0.5%) | 9.5% (+0.5%) | 19 |
| مكافأة نهاية الخدمة | 1% | 1% | 36 |
| اصابات العمل | 1.5% | — | 46 |
| المرض | 3.25% | 1% | 70 |
| البطالة | 1% | — | 86 |
| الاجمالي | 19.25% (كانت 18.75%) | 11.5% (كانت 11%) |
خلي بالك في اصابات العمل. الـ 1.5% دي عبارة عن 1% للعلاج والرعاية الطبية و0.5% للحقوق المالية ، والجزء التاني دا ممكن يزيد لحد 1% حسب مخاطر نشاط المنشأة طبقا للمادة 46. يعني لو الهيئة محددالك نسبة اعلى ، اعتبرها في حسابك – والحاسبة بتسمحلك تغيرها.
الزيادة على الموظف وعلى الشركة بالارقام
في 2027 في تغييرين مع بعض: النسب زادت ، والحد الادنى والاقصى لأجر الاشتراك زادوا (من 2,700 و16,700 في 2026 لـ 3,200 و19,300 في 2027). تعالوا نشوف تلات موظفين اجر يناير بتاعهم ثابت في السنتين:
| الموظف | اجر يناير | اجر الاشتراك 2026 ← 2027 | حصة العامل 2026 ← 2027 | حصة صاحب العمل 2026 ← 2027 |
|---|---|---|---|---|
| موظف 1 | 3,000.00 | 3,000.00 ← 3,200.00 | 330.00 ← 368.00 (+38.00) | 562.50 ← 616.00 (+53.50) |
| موظف 2 | 10,000.00 | 10,000.00 ← 10,000.00 | 1,100.00 ← 1,150.00 (+50.00) | 1,875.00 ← 1,925.00 (+50.00) |
| موظف 3 | 25,000.00 | 16,700.00 ← 19,300.00 | 1,837.00 ← 2,219.50 (+382.50) | 3,131.25 ← 3,715.25 (+584.00) |
موظف 2 اجره جوه الحدين ، فالفرق جاي من النسبة بس: 50 جنيه على العامل و50 على الشركة. موظف 1 وموظف 3 الفرق عندهم اكبر لأن اجر الاشتراك نفسه اتغير: موظف 1 اتأمن بالحد الادنى الجديد ، وموظف 3 اتأمن بالحد الاقصى الجديد.
حصة صاحب العمل الشهرية للتلات موظفين (جنيه)
الزيادة الشهرية على الشركة = 687.50 جنيه ، يعني 8,250.00 جنيه في السنة للتلات موظفين بس.
مثال: شركة فيها 20 موظف كل واحد اجر اشتراكه 10,000 جنيه
وعلى الناحية التانية ، حصة العامل في التأمينات بتتخصم من وعاء ضريبة كسب العمل (المادة 13 من قانون الضريبة على الدخل 91 لسنة 2005) ، فالزيادة في التأمينات هتقلل الضريبة بتاعة الموظف حاجة بسيطة ، والصافي هيقل بأقل من الزيادة نفسها.
ايه المطلوب منك قبل يناير 2027؟
1
حدّث نظام المرتبات
غيّر النسب لـ 11.5% و19.25% ، والحدين لـ 3,200 و19,300 ، من مرتب يناير 2027.
2
جهز اجور يناير
اجر الاشتراك بيتحدد على اجر يناير وبيفضل ثابت طول السنة ، وبيتبلغ على استمارة 2.
3
حدّث الميزانية
زوّد بند التأمينات في ميزانية 2027 بالفرق اللي هتطلعهولك الحاسبة.
4
بلّغ الموظفين
قول للموظفين قبلها إن الخصم هيزيد شوية بسبب القانون مش بسبب الشركة ، عشان ميتفاجئوش في اول مرتب.
الأثر العملي: لو نسيت تحدّث النسب في نظام المرتبات ، هتسدد الاشتراكات بنسب 2026 والهيئة هتطالبك بالفرق ، ولو اتأخرت فيه بيتحسب عليك مبلغ اضافي عن التأخير. راجع النسب قبل اول مرتب في يناير.
اسئلة شائعة عن نسب التأمينات 2027
كام نسب التأمينات 2027؟
من اول يناير 2027 حصة العامل 11.5% وحصة صاحب العمل 19.25% من اجر الاشتراك ، بدل 11% و18.75% (المادة 19 من قانون 148 لسنة 2019).
ليه نسب التأمينات زادت؟
لأن المادة 19 بتزود نسبة تأمين الشيخوخة والعجز والوفاة 1% كل سبع سنين من تاريخ العمل بالقانون ، والزيادة بتتقسم مناصفة ، واول سبع سنين خلصت في اول 2027.
امتى نسب التأمينات هتزيد تاني؟
طبقا لنفس المادة الزيادة الجاية بعد سبع سنين ، يعني من يناير 2034 ، على الا يزيد اجمالي نسبة الاشتراكات عن 26%.
هل الحد الادنى والاقصى لأجر الاشتراك اتغيروا كمان؟
ايوه ، في 2027 الحد الادنى 3,200 جنيه والاقصى 19,300 جنيه ، بزيادة 15% على حدود 2026 (2,700 و16,700) مع الجبر لأقرب 100 طبقا للمادة 53 من اللائحة التنفيذية.
هل في نوع تأمين تاني نسبته اتغيرت؟
لأ ، المكافأة والمرض والبطالة واصابات العمل زي ما هي ، الزيادة كلها في الشيخوخة والعجز والوفاة.
خلاصة
من يناير 2027: 11.5% على العامل و19.25% على صاحب العمل ، والحدين 3,200 و19,300. الفرق على الموظف اللي اجره جوه الحدين نص في المية من اجره ، وعلى الشركة نفس الكلام. حدّث النظام والميزانية قبل يناير ، واستخدم الحاسبة تطلعلك الفرق لكل موظفينك.
وفي الختام ارجو يكون المقال افاد حضراتكم ولو بجزء بسيط في الشغل.
عايز تجهز التأمينات والمرتبات لسنة 2027؟
فريق كارييريانز بيحدّث نسب وحدود التأمينات في كشف المرتبات ، ويجهز استمارة 2 ، ويحسبلك اثر الزيادة على ميزانية الشركة.
تابع ايضا:
شرح وتعريف الاجر | المرتب | اجر الاشتراك التاميني | وحساب البدلات المعفاه
الحد الادنى للاجر الشامل والاجر التاميني
شرح استمارة 1 واستمارة 6 تأمينات خطوة بخطوة
طريقة حساب اجر الاضافي وفقا لقانون العمل الجديد
كمان تقدر تتابع قناتنا على اليوتيوب لمزيد من الشروحات: إتعلم Personnel
النسب منقولة من المواد 19 و36 و46 و70 و86 من قانون التأمينات الاجتماعية والمعاشات رقم 148 لسنة 2019 ، والحدود من المادة 53 من لائحته التنفيذية (قرار رئيس مجلس الوزراء 2437 لسنة 2021) واعلان الهيئة القومية للتأمين الاجتماعي لحدود 2026. الامثلة للتوضيح وبتفترض إن اجر يناير ثابت في السنتين.
