10 اخطاء في الـ Payroll بتكلف الشركة غرامات وازاي تتجنبها
10 اخطاء في الـ Payroll بتكلف الشركة غرامات وازاي تتجنبها
النهارده هنتكلم عن 10 اخطاء في الـ Payroll بتكلف الشركة غرامات وفروق ، ودا لأن غلطة المرتبات مش بتظهر في نفس الشهر ، بتظهر بعد سنة في تفتيش او تسوية او شكوى موظف ، وساعتها بتبقى متكررة على كل الموظفين وكل الشهور.
في المقالة دي هنعرف كل غلطة ، وسندها في القانون ، وتكلفتها ، وازاي تتجنبها بمراجعة شهرية بسيطة.
الاول متفقين إن غرامات قانون العمل في الاجور بتتعدد بعدد العمال اللي حصلت المخالفة في حقهم وبتتضاعف في العود. يعني غلطة صغيرة في شيت المرتبات على 50 موظف ممكن تبقى 50 غرامة.
| الاخطاء10 | غرامة مواعيد الاجر2,000 – 20,000 (م 287) | غرامة العلاوة وحماية الاجر500 – 5,000 (م 288) | الغرامةبتتعدد بعدد العمال |
الاخطاء العشرة
1. التأمين على الاساسي بس او على اجر قديم
اجر الاشتراك هو المقابل النقدي لقاء العمل الاصلي على اجر يناير ، مش الاساسي لوحده. الغلط ده بيطلع فروق اشتراكات على الشركة ومعاش اقل للموظف. السند: قانون 148 لسنة 2019.
2. تجاهل الحد الادنى والاقصى لأجر الاشتراك
اللي اجره اقل من الحد الادنى بيتأمن عليه بالحد الادنى ، واللي اكبر من الاقصى بيتأمن عليه بالحد الاقصى ، والحدين بيتغيروا كل يناير. السند: قانون 148 لسنة 2019.
3. الضريبة الشهرية من غير حساب المكافآت
لما المكافأة تتصرف في شهر والضريبة تتحسب كأنها مرتب عادي ، الفرق بيظهر في التسوية ويتطلب من الموظف مرة واحدة. السند: القانون 7 لسنة 2024.
4. نسيان التسوية السنوية
الشركة هي جهة الخصم ، فالفرق اللي ما اتسواش بيتحسب عليها. السند: قانون 91 لسنة 2005.
5. خصم اكتر من المسموح
الخصم لأي دين ما يزيدش عن 25% من الاجر (50% لدين النفقة) ، وقسط السلفة ما يزيدش عن 10% ومن غير فايدة ، والنسبة بتتحسب بعد الضريبة والتأمينات. السند: المواد 113 و114.
6. صرف المرتب من غير اثبات
ذمة الشركة ما بتبراش الا بتوقيع العامل على الكشف او بتحويل المرتب للبنك ، ولازم الموظف ياخد بيان بمفردات اجره. السند: المادة 115.
7. التأخير في المرتب او المستحقات النهائية
المرتب الشهري مرة على الاقل في الشهر ، والمستحقات عند انتهاء العلاقة خلال 7 ايام من مطالبة العامل. السند: المادة 108 – غرامة 2,000 لـ 20,000 (م 287).
8. الاضافي محسوب غلط
نسب الاضافي وساعات العمل ليها احكام في قانون العمل الجديد ، والغلط فيها بيتكرر كل شهر. السند: المواد 117 وما بعدها – شرحها في مقال الاضافي.
9. نسيان العلاوة الدورية
علاوة سنوية لا تقل عن 3% من الاجر التأميني بعد سنة من التعيين او من آخر علاوة. السند: المادة 12 – غرامة 500 لـ 5,000 (م 288).
10. شيت مفتوح من غير مراجعة تانية
رقم مكتوب فوق معادلة او شريحة قديمة بيفضل شهور من غير ما حد ياخد باله. السند: ممارسة داخلية.
خلي بالك. الغرامات اللي فوق منقولة من المادتين 287 و288 من قانون العمل 14 لسنة 2025 ، وشرحنا كل غرامات القانون في مقال غرامات وعقوبات قانون العمل الجديد. ده غير الفروق نفسها اللي الشركة بتدفعها للتأمينات او الضرائب او الموظف.
المراجعة الشهرية قبل الصرف
مراجعة كشف المرتبات – كل شهر قبل التحويل
الأثر العملي: اغلب الاخطاء دي بتتحل بحاجتين: شيت محمي معادلاته ما بتتلمسش ، ومراجع تاني كل شهر قبل التحويل. الشيت تلاقيه مجانا في مقال شيت حساب المرتبات الشهري الكامل ، والمراجعة عشر دقايق بالقائمة اللي فوق.
اسئلة شائعة عن اخطاء المرتبات
ايه اكتر غلطة في حساب المرتبات؟
التأمين على اجر غلط (الاساسي بس او اجر سنة فاتت) ، لأنها بتتكرر كل شهر على كل الموظفين.
اقصى نسبة خصم من المرتب كام؟
25% لأي دين ، و50% لدين النفقة ، وقسط السلفة 10% بحد اقصى ، بعد استقطاع الضريبة والتأمينات (المادتين 113 و114).
امتى لازم اصرف مستحقات الموظف اللي ساب؟
خلال 7 ايام من تاريخ مطالبة العامل بيها (المادة 108).
كام العلاوة الدورية في قانون العمل الجديد؟
لا تقل عن 3% من الاجر التأميني ، بعد سنة من التعيين او من آخر علاوة (المادة 12).
خلاصة
اخطاء المرتبات بتتكرر وبتتعدد بعدد الموظفين ، عشان كدا اتأكد من اجر الاشتراك والحدود والضريبة والخصومات ومواعيد الصرف كل شهر ، واعمل التسوية في يناير ، وخلي في مراجع تاني.
وفي الختام ارجو يكون المقال افاد حضراتكم ولو بجزء بسيط في الشغل.
عايز مراجعة كاملة لنظام المرتبات في شركتك؟
فريق كارييريانز بيراجع كشوف المرتبات والتأمينات والضرائب لآخر سنة ، ويطلعلك الفروق والمخاطر ويظبط طريقة الحساب.
تابع ايضا:
تحميل شيت حساب المرتبات الشهري الكامل excel
غرامات وعقوبات قانون العمل الجديد على المنشآت وازاي تتجنبها
طريقة حساب اجر الاضافي وساعات العمل وفقا لقانون العمل الجديد
تحميل شيت حساب التسوية السنوية لضريبة كسب العمل – الدخل 2026
كمان تقدر تتابع قناتنا على اليوتيوب لمزيد من الشروحات: إتعلم Personnel
الاحكام منقولة من قانون العمل رقم 14 لسنة 2025 (المواد 12 و108 و113 إلى 115 و287 و288) ، وقانون التأمينات 148 لسنة 2019 ، وقانون الضريبة على الدخل 91 لسنة 2005 المعدل بالقانون 7 لسنة 2024.
