تشغيل النساء في قانون العمل الجديد – اجازة الوضع ورعاية الطفل وساعة الرضاعة
تشغيل النساء في قانون العمل الجديد – اجازة الوضع ورعاية الطفل وساعة الرضاعة
النهارده هنتكلم عن تشغيل النساء في قانون العمل الجديد 14 لسنة 2025 ، ودا لأن القانون الجديد زود اجازة الوضع لأربع شهور ، وغير قواعد ساعات العمل للحامل ، وده بيأثر على الجداول والمرتبات والتأمينات في نفس الوقت.
في المقالة دي هنمشي على حقوق العاملة من الحمل لحد ما الطفل يكمل سنتين ، مادة مادة ، ومين بيدفع ايه في اجازة الوضع ، والتزامات صاحب العمل اللي ناس كتير مش واخدة بالها منها.
الاول متفقين إن المادة 53 بتقول إن كل احكام تشغيل العمال بتسري على النساء من غير تمييز ، وإن الاجر لازم يكون متساوي عن العمل ذي القيمة المتساوية بكل عناصره. والمواد من 54 لـ 60 بتضيف حماية خاصة للأمومة.
| اجازة الوضع4 شهور مدفوعة | بعد الولادة45 يوم على الاقل | فترات الرضاعةنص ساعة × 2 لمدة سنتين | السندالمواد 53 – 60 |
من الحمل لحد السنتين: الحقوق بالترتيب
من الشهر السادس للحمل
تخفيض ساعات العمل
ساعات العمل اليومية بتقل ساعة على الاقل ، وممنوع تشغيلها ساعات اضافية طول الحمل (المادة 54).
قبل الولادة وبعدها
اجازة الوضع
4 شهور مدفوعة الاجر تشمل اللي قبل الولادة واللي بعدها ، بشرط ما يقلش اللي بعد الولادة عن 45 يوم ، وبشهادة طبية بالتاريخ المرجح للولادة ، وبحد اقصى 3 مرات طول الخدمة (المادة 54).
يوم الولادة
اجازة الاب
الاب ليه يوم اجازة طارئة مدفوعة يوم الولادة ما بيتحسبش من رصيده ، بحد اقصى 3 مرات طول الخدمة (المادة 128).
بعد الاجازة
الرجوع للوظيفة
ليها ترجع لنفس وظيفتها او وظيفة مماثلة بنفس المزايا ، وممنوع فصلها اثناء الاجازة ، وبعد رجوعها ممنوع الا لسبب مشروع (المادة 55).
لحد 6 شهور بعد الولادة
بدون اضافي
ممنوع الزامها بساعات عمل اضافية لحد 6 شهور من تاريخ الوضع (المادة 54).
لحد سنتين بعد الولادة
فترات الرضاعة
فترتين كل واحدة نص ساعة على الاقل غير الراحة العادية ، وليها تضمهم ، وبيتحسبوا من ساعات العمل من غير اي خصم (المادة 56).
مين بيدفع اجر اجازة الوضع؟
الاجازة مدفوعة الاجر بالكامل من صاحب العمل (المادة 54) ، لكن صاحب العمل بيخصم من الاجر اللي ملتزم بيه التعويض اللي بتصرفه التأمينات. والمادة 77 من قانون التأمينات 148 لسنة 2019 بتدي المؤمن عليها تعويض عن الاجر 75% عن مدة اجازة الحمل والوضع ، بشرط ما تقلش مدة اشتراكها عن 10 شهور ، والتعويض بيتحسب على اجرها اليومي المسدد عنه الاشتراك (المادة 76).
مثال
عاملة مؤمن عليها من سنتين ، اجرها 10,000 جنيه في الشهر واجر اشتراكها 10,000 ، وخدت اجازة وضع 4 شهور :-
الاجر المستحق عن الاجازة = 10,000 × 4 = 40,000 جنيه
تعويض التأمينات = 75% من الاجر المسدد عنه الاشتراك = 7,500 × 4 = 30,000 جنيه (المادتين 76 و77)
صاحب العمل بيدفع الفرق = 40,000 – 30,000 = 10,000 جنيه
والنتيجة إن العاملة بتاخد اجرها كامل
التزامات صاحب العمل
| الالتزام | امتى بيطبق | السند |
|---|---|---|
| تعليق نظام تشغيل النساء في مكان العمل | لو بيشغل عاملة واحدة او اكتر | م 59 |
| ساعات عمل مرنة او عمل عن بعد في النظام | للأم اللي بترعى طفل من ذوي الاعاقة او الاقزام | م 59 |
| اجازة رعاية طفل بدون اجر لحد سنتين (3 مرات) | المنشأة فيها 50 عامل فأكثر وبعد سنة خدمة | م 57 |
| دار حضانة او التعاقد مع دار حضانة | 100 عاملة فأكثر في مكان واحد (او اشتراك المنشآت الصغيرة في منطقة واحدة) | م 60 |
| عدم تشغيلها في الاعمال اللي بيحددها قرار الوزير | حماية الأمومة او مخاطر السلامة | م 53 |
خلي بالك. المادة 58 بتدي العاملة الحق تنهي العقد بسبب زواجها او حملها او انجابها ، بشرط تخطر صاحب العمل كتابة خلال 3 شهور من الزواج او ثبوت الحمل او الوضع ، ومن غير ما تخسر حقوقها في القانون او التأمينات.
الأثر العملي: اكتر غلطتين بنشوفهم: الاولى إن الشركة تحسب اجازة الوضع 3 شهور زي القانون القديم ، والتانية إنها تكتب الحامل في جدول اضافي. الاتنين مخالفة ، والقانون الجديد بيحاسب على كل عاملة اتأثرت. حدّث لائحة تنظيم العمل وجدول الورديات على المواد دي.
اسئلة شائعة عن تشغيل النساء
كام مدة اجازة الوضع في قانون العمل الجديد؟
4 شهور مدفوعة الاجر ، منها 45 يوم على الاقل بعد الولادة ، وبحد اقصى 3 مرات طول مدة الخدمة (المادة 54).
كام ساعة الرضاعة في قانون العمل الجديد؟
فترتين كل واحدة نص ساعة على الاقل لمدة سنتين من الولادة ، وممكن تضمهم ، وبيتحسبوا من ساعات العمل (المادة 56).
هل في اجازة رعاية طفل؟
ايوه ، بدون اجر لحد سنتين ، 3 مرات طول الخدمة ، في المنشآت اللي فيها 50 عامل فأكثر وبعد سنة خدمة (المادة 57).
هل الاب ليه اجازة ولادة؟
ايوه ، يوم اجازة مدفوعة يوم الولادة ما بيتحسبش من رصيده ، بحد اقصى 3 مرات (المادة 128).
خلاصة
اجازة وضع 4 شهور مدفوعة ، ساعة اقل من الشهر السادس ، لا اضافي لحد 6 شهور بعد الولادة ، فترتين رضاعة لمدة سنتين ، ورجوع لنفس الوظيفة. ولو المنشأة كبيرة: اجازة رعاية طفل وحضانة.
وفي الختام ارجو يكون المقال افاد حضراتكم ولو بجزء بسيط في الشغل.
عايز تحدث لائحة شركتك على قانون العمل الجديد؟
فريق كارييريانز بيراجع لائحة تنظيم العمل ونظام تشغيل النساء وجداول العمل ، ويطابقها مع القانون 14 لسنة 2025.
تابع ايضا:
الاجازات في قانون العمل الجديد
ملخص قانون العمل الجديد – اهم 20 تغيير على صاحب العمل
ساعات العمل والراحة الاسبوعية والعطلات الرسمية 2027
تحميل قانون العمل الجديد رقم 14 لسنة 2025
كمان تقدر تتابع قناتنا على اليوتيوب لمزيد من الشروحات: إتعلم Personnel
الاحكام منقولة من قانون العمل رقم 14 لسنة 2025 (المواد 53 الى 60 و128) ، وتعويض الاجر من المادة 77 من قانون التأمينات الاجتماعية والمعاشات رقم 148 لسنة 2019.
