الاجر في قانون العمل الجديد – مكوناته والعلاوة الدورية ومواعيد السداد
الاجر في قانون العمل الجديد – مكوناته والعلاوة الدورية ومواعيد السداد
النهارده هنتكلم عن الاجر في قانون العمل الجديد 14 لسنة 2025 ، ودا لأن كلمة “الاجر” في القانون اوسع بكتير من “المرتب” اللي في العقد ، وتعريفها هو اللي بيتحسب عليه الاضافي والاجازات والتعويضات والعلاوة.
في المقالة دي هنعرف الاجر بيتكون من ايه ، والعلاوة الدورية بتتحسب ازاي ، ومواعيد وطريقة الصرف ، والخصومات المسموحة ، وكل حاجة بسند المادة من القانون.
الاول متفقين إن المادة 1 بتعرف الاجر بإنه “كل ما يحصل عليه العامل لقاء عمله نقدا كان او عينا” ، وبتقسمه لأجر اساسي (اللي في العقد وما يطرأ عليه من علاوات) واجر متغير (باقي العناصر). والتقسيم ده مهم لأن كل حق في القانون بيتحسب على جزء معين.
| التعريفالمادة 1 بند 4 | العلاوة الدورية3% من الاجر التأميني على الاقل | الخصم25% بحد اقصى | المستحقات النهائيةخلال 7 ايام من المطالبة |
الاجر بيتكون من ايه؟
| العنصر | التعريف في القانون |
|---|---|
| الاجر الاساسي | الاجر المنصوص عليه في عقد العمل وما يطرأ عليه من علاوات |
| العمولة او النسبة | مبلغ مقابل ما ينتجه العامل او يبيعه او يحصّله |
| العلاوات | مبلغ او نسبة من الاساسي لمواجهة ظروف اقتصادية او اجتماعية او فنية ما لم تضم للاساسي |
| المنح | ما يعطى زيادة على الاجر متى كانت مقررة في العقود او الانظمة او جرت العادة بمنحها |
| المكافأة | ما يصرف نظير اجادة او تميز او كفاءة |
| البدلات | ما يعطى لقاء ظروف او مخاطر معينة في اداء العمل |
| نصيب العامل في الارباح | ما يصرف من صافي الارباح وفقا للقوانين المنظمة |
| الوهبة ومقابل الخدمة | من غير صاحب العمل اذا جرت العادة وكانت لها قواعد ، ومقابل الخدمة في المنشآت السياحية والفندقية |
خلي بالك. ده تعريف الاجر في قانون العمل. اجر الاشتراك في التأمينات ليه تعريف تاني في قانون التأمينات 148 لسنة 2019 ، والوعاء الضريبي ليه قواعد في قانون الضريبة – شرحناهم في مقال الاجر التأميني 2027 ومقال البدلات المعفاة والوعاء الضريبي.
العلاوة الدورية
المادة 12 بتدي العاملين علاوة سنوية دورية لا تقل عن 3% من الاجر التأميني ، بتستحق بعد سنة من التعيين او من آخر علاوة. ولو المنشأة مرت بظروف اقتصادية يتعذر معاها صرفها ، بيتعرض الامر على المجلس القومي للأجور يبت في تخفيضها او الاعفاء منها خلال 30 يوم. والمجلس هو كمان اللي بيحدد الحد الادنى للأجور والحد الادنى للعلاوة (المادة 102) ، والمنشآت ملزمة بقراراته (المادة 104).
مثال
موظف اتعين 1 مارس 2026 ، واجره التأميني 12,000 جنيه :-
تستحق العلاوة في 1 مارس 2027
الحد الادنى للعلاوة = 12,000 × 3% = 360 جنيه شهريا
وصاحب العمل ممكن يدي اكتر ، لكن مش اقل الا بقرار من المجلس القومي للأجور
الصرف: امتى وفين وازاي
مرة على الاقل في الشهر
اصحاب الاجر الشهري
في يوم عمل وفي مكان العمل ، كاش او في حساب العامل البنكي (المادة 108).
كل اسبوع
الاجر بالانتاج او العمولة
لو الشغل اكتر من اسبوعين ، دفعة تحت الحساب كل اسبوع والباقي خلال الاسبوع التالي للتسليم (المادة 108).
عند الصرف
اثبات السداد
ذمة صاحب العمل ما بتبراش الا بتوقيع العامل او بالتحويل البنكي ، والعامل ياخد بيان بمفردات اجره (المادة 115).
خلال 7 ايام
المستحقات النهائية
عند انتهاء العلاقة لأي سبب ، من تاريخ مطالبة العامل (المادة 108).
الخصومات والقيود
| القاعدة | الحد | السند |
|---|---|---|
| قسط السلفة | 10% من الاجر بحد اقصى ومن غير فايدة | م 113 |
| الخصم لأي دين | 25% من الاجر (50% لدين النفقة) ، بعد الضريبة والتأمينات | م 114 |
| حجز الاجر | ممنوع احتجاز الاجر او جزء منه من غير سند قانوني | م 108 |
| الحد الادنى | ما يحصل عليه العامل ما يقلش عن الحد الادنى للأجور | م 108 |
| تغيير طريقة الاجر | ممنوع النقل من الشهري لليومية او بالساعة او بالانتاج الا بموافقة العامل | م 110 |
| الحضور مع المنع | لو العامل حضر وصاحب العمل منعه: اجر كامل ، ولو قوة قاهرة: نص الاجر | م 111 |
الأثر العملي: الغلطة المتكررة إن الشركة تعتبر “العلاوة” اختيارية او تحسبها على الاساسي بس. القانون الجديد بيحسب الحد الادنى على الاجر التأميني ، واللي ما يصرفهاش من غير قرار المجلس القومي للأجور بيعرض نفسه لغرامة من 500 لـ 5,000 جنيه عن كل عامل (المادة 288).
اسئلة شائعة عن الاجر في قانون العمل الجديد
ما هو تعريف الاجر في قانون العمل الجديد؟
كل ما يحصل عليه العامل لقاء عمله نقدا او عينا ، ويشمل الاجر الاساسي والاجر المتغير زي العمولة والعلاوات والمنح والمكافآت والبدلات ونصيب الارباح (المادة 1).
كام العلاوة الدورية في قانون العمل الجديد؟
لا تقل عن 3% من الاجر التأميني ، وتستحق بعد سنة من التعيين او من آخر علاوة (المادة 12).
امتى لازم اصرف المرتب؟
لأصحاب الاجر الشهري مرة على الاقل في الشهر ، في يوم عمل ، كاش او في الحساب البنكي (المادة 108).
اقصى خصم من المرتب كام؟
25% لأي دين و50% لدين النفقة ، وقسط السلفة 10% بحد اقصى (المادتين 113 و114).
خلاصة
الاجر = اساسي + متغير بكل عناصره. العلاوة لا تقل عن 3% من الاجر التأميني بعد سنة ، الصرف مرة في الشهر على الاقل بإثبات وبيان مفردات ، والمستحقات النهائية خلال 7 ايام ، والخصم 25% بحد اقصى.
وفي الختام ارجو يكون المقال افاد حضراتكم ولو بجزء بسيط في الشغل.
عايز تراجع هيكل الاجور في شركتك؟
فريق كارييريانز بيراجع عناصر الاجر والعلاوات وطريقة الصرف والخصومات ، ويطابقها مع قانون العمل والتأمينات والضرائب.
تابع ايضا:
شرح وتعريف الاجر | المرتب | اجر الاشتراك التاميني
10 اخطاء في الـ Payroll بتكلف الشركة غرامات
تحميل شيت حساب المرتبات الشهري الكامل excel
غرامات وعقوبات قانون العمل الجديد
كمان تقدر تتابع قناتنا على اليوتيوب لمزيد من الشروحات: إتعلم Personnel
الاحكام منقولة من قانون العمل رقم 14 لسنة 2025 (المواد 1 و12 و53 و102 و104 و105 و107 و108 و110 الى 115 و288).
