الاجازات في قانون العمل الجديد – السنوية والمرضية والعارضة والوضع وطريقة حسابها
ايه انواع الاجازات في قانون العمل الجديد رقم 14 لسنة 2025 وازاي تتحسب؟
النهارده هنتكلم عن الاجازات في قانون العمل الجديد – السنوية والمرضية والعارضة والوضع وطريقة حسابها ، ودا لأن الاجازات من اكتر الحاجات اللي بتعمل خلاف بين الموظف والشركة ، وكل واحد فاكر حاجة مختلفة عن اللي في القانون.
جمعنا لك كل انواع الاجازات في جدول واحد بالمدة والاجر ورقم المادة ، وبعدها شرح كل نوع بالتفصيل وامثلة حساب رصيد الاجازة السنوية وتعويض الاجازة المرضية.
الاول متفقين إن القانون بيحط الحد الادنى للاجازات ، وسياسة شركتك ممكن تدي اكتر لكن مينفعش تدي اقل. واي ميزة احسن بتديها الشركة فعلا بتفضل قائمة (المادة 6) ، ولازم تتكتب في لائحة تنظيم العمل طبقا لقرار 162 لسنة 2026.
| السندم ٥٤ – ٥٧ و١٢٤ – ١٣١ | السنوية١٥ / ٢١ / ٣٠ / ٤٥ يوم | العارضة٧ ايام من السنوية | الوضع٤ شهور |
جدول الاجازات في قانون العمل الجديد
| الاجازة | المدة | الاجر | المادة |
|---|---|---|---|
| السنوية – السنة الاولى | ١٥ يوم (بعد ٦ شهور خدمة بنسبة المدة) | باجر كامل | م ١٢٤ |
| السنوية – من السنة التانية | ٢١ يوم | باجر كامل | م ١٢٤ |
| السنوية – ١٠ سنين خدمة او فوق ٥٠ سنة | ٣٠ يوم | باجر كامل | م ١٢٤ |
| السنوية – ذوي الاعاقة والاقزام | ٤٥ يوم | باجر كامل | م ١٢٤ |
| زيادة الاعمال الخطرة والمناطق النائية | + ٧ ايام | باجر كامل | م ١٢٤ وقرار ٤٩ لسنة ٢٠٢٦ |
| العارضة | ٧ ايام في السنة ، يومين بحد اقصى في المرة | من رصيد السنوية | م ١٢٨ |
| يوم ولادة مولود للأب | يوم واحد ، ٣ مرات طول الخدمة | باجر – مش من السنوية | م ١٢٨ |
| العطلات والاعياد الرسمية | حسب قرار الوزير | باجر كامل | م ١٢٩ وقرارا ٢٩٤ و٣٤٦ لسنة ٢٠٢٥ |
| الامتحانات | ايام الامتحان الفعلية | باجر – مش من السنوية | م ١٢٦ |
| الحج او زيارة بيت المقدس | شهر مرة واحدة بعد ٥ سنين متصلة | باجر | م ١٣٠ |
| المرضية | حسب الجهة الطبية | تعويض من التأمينات ٧٥٪ ثم ٨٥٪ | م ١٣١ وقانون ١٤٨ م ٧٦ |
| الوضع | ٤ شهور (٤٥ يوم على الاقل بعد الولادة) ، ٣ مرات | مدفوعة | م ٥٤ |
| رعاية الطفل | لحد سنتين ، ٣ مرات (منشأة ٥٠ عامل فأكثر) | بدون اجر | م ٥٧ |
رصيد الاجازة السنوية حسب الحالة (يوم)
المصدر: المادة 124 من قانون العمل 14 لسنة 2025 وقرار 49 لسنة 2026.
الاجازة السنوية بالتفصيل
المادة 124 بتقول إن الاجازة السنوية باجر ، ومش بيدخل في حسابها ايام العطلات الرسمية والراحة الاسبوعية. يعني لو الموظف اخد اسبوع اجازة وفيه يوم الجمعة ويوم عيد ، مش بيتخصموا من رصيده.
ولو مدة خدمة الموظف اقل من سنة ، بتبقى اجازته بنسبة المدة اللي قضاها ، بشرط يكون قضى 6 شهور على الاقل.
والمادة 125 حطت قواعد مهمة جدا:
- صاحب العمل هو اللي بيحدد مواعيد الاجازة حسب ظروف الشغل ، ومينفعش يقطعها الا لاسباب قوية.
- الموظف مينفعش يتنازل عن اجازته ، ولو رفض كتابة يقوم بالاجازة في الميعاد اللي اتحدد له بيسقط حقه في مقابلها.
- لازم ياخد 15 يوم في السنة منهم 6 ايام متصلة على الاقل.
- الشركة لازم تسوي رصيد الاجازات او الاجر المقابل له كل 3 سنين على الاكتر.
- لو العلاقة انتهت قبل ما يستنفد رصيده بيستحق الاجر المقابل للرصيد.
تعالوا بقا نحسب
مثال (1) – رصيد موظف جديد
موظف اتعين من 8 شهور وسياسة الشركة زي القانون (15 يوم في السنة الاولى). رصيده كام؟
الرصيد :- 15 × 8 ÷ 12 = 10 ايام.
مثال (2) – مقابل رصيد عند انتهاء الخدمة
موظف اجره الشامل 9000 جنيه وخرج وليه رصيد 12 يوم. المقابل كام؟
اجر اليوم :- 9000 ÷ 30 = 300 ج.
مقابل الرصيد :- 300 × 12 = 3600 ج.
ملحوظة ( القسمة على 30 هي الطريقة المعتادة لحساب اجر اليوم ، واتبع اللي مكتوب في لائحة شركتك وعقد العمل ).
الاجازة المرضية وتعويض الاجر
المادة 131 بتقول إن العامل اللي يثبت مرضه له اجازة مرضية تحددها الجهة الطبية المختصة ، ويستحق خلالها تعويض عن الاجر بالنسبة والمدة اللي في قانون التأمينات الاجتماعية. والمادة 76 من قانون التأمينات 148 لسنة 2019 حددت التعويض كده: 75% من الاجر اليومي المسدد عنه الاشتراكات لمدة 90 يوم ، وبعدها 85% ، بشرط ما يقلش عن الحد الادنى للاجر ، وبحد اقصى 180 يوم في السنة الميلادية.
75%
تعويض اول 90 يوم
85%
بعد 90 يوم
180 يوم
حد اقصى في السنة
الحد الادنى
للاجر كحد ادنى للتعويض
مثال (3) – تعويض المرض
موظف اجره التأميني 6000 جنيه اخد اجازة مرضية 10 ايام. التعويض كام؟
الاجر اليومي :- 6000 ÷ 30 = 200 ج.
التعويض :- 200 × 75% × 10 = 1500 ج.
المنشآت الصناعية ليها نظام اطول. لو الشركة منشأة صناعية بيسري عليها قانون تيسير منح تراخيص المنشآت الصناعية 15 لسنة 2017 ، العامل المريض له كل 3 سنين خدمة: 3 شهور باجر ، ثم 6 شهور بـ 85% ، ثم 3 شهور بـ 75% ، لو الجهة الطبية قررت احتمال شفائه ، وبيتخصم من اللي بتدفعه الشركة اللي بتدفعه التأمينات (المادة 131). وللعامل يستخدم متجمد اجازاته السنوية جنب المرضية او يطلب تحويل المرضية لسنوية لو رصيده يسمح.
شرحنا طريقة حساب تعويض المرض بالتفصيل في مقال حساب تعويض اجر الاجازات المرضية بالتفصيل.
الاجازة العارضة ويوم الولادة
المادة 128: للعامل ينقطع عن العمل لسبب عارض لحد 7 ايام في السنة وبحد اقصى يومين في المرة ، والعارضة بتتحسب من الاجازة السنوية. وجديد القانون إن العامل اللي بيتولد له مولود له اجازة طارئة مدفوعة يوم الولادة ، مش من رصيده ، بحد اقصى 3 مرات طول الخدمة.
اجازات المرأة العاملة
اجازة الوضع
4 شهور مدفوعة تشمل قبل وبعد الولادة ، على الا تقل بعد الولادة عن 45 يوم ، بشهادة طبية ، ولحد 3 مرات طول الخدمة (المادة 54). ومن الشهر السادس للحمل ساعات العمل اليومية بتقل ساعة على الاقل.
ساعات الرضاعة
لمدة سنتين بعد الولادة ، فترتين كل واحدة نص ساعة على الاقل ، ومن حقها تضمهم ، وبيتحسبوا من ساعات العمل من غير خصم (المادة 56).
اجازة رعاية الطفل
في المنشأة اللي فيها 50 عامل فأكثر ، للعاملة اجازة بدون اجر لحد سنتين لرعاية طفلها ، 3 مرات طول الخدمة ، بشرط تكون قضت سنة في المنشأة ، وبين الاجازة الاولى والتانية سنتين على الاقل (المادة 57).
العطلات الرسمية والدينية
المادة 129 ادت العامل اجازة باجر في العطلات والاعياد اللي بيحددها قرار الوزير ، ولو اشتغل فيها ياخد اجره + مثليه او يوم تاني بدلها بطلب كتابي منه. والعطلات اتحددت بقرار 294 لسنة 2025 ، والاجازات الدينية للاخوة المسيحيين بقرار 346 لسنة 2025 – التفاصيل في مقال اللائحة التنفيذية وقرارات وزير العمل.
الأثر العملي: اعمل ملف اجازات لكل موظف فيه الرصيد والمستخدم وتاريخ آخر تسوية ، لأن المادة 125 بتلزمك تسوي الرصيد كل 3 سنين ، ولو الموظف خرج هتدفع مقابل الرصيد كله. ومخالفة احكام الاجازات (المواد 124 و125 و126 و128 و129 و131) من المخالفات اللي عقوبتها غرامة من 500 لـ 5000 جنيه بتتعدد بعدد العمال (المادة 288).
اسئلة شائعة عن الاجازات في قانون العمل الجديد
كام يوم الاجازة السنوية في قانون العمل الجديد؟
15 يوم في السنة الاولى ، 21 يوم من السنة التانية ، 30 يوم لمن قضى 10 سنين او عدى 50 سنة ، و45 يوم لذوي الاعاقة والاقزام ، و7 ايام زيادة للاعمال الخطرة والمناطق النائية (المادة 124).
هل الاجازة العارضة بتتخصم من السنوية؟
ايوه ، 7 ايام في السنة وبحد اقصى يومين في المرة ، وبتتحسب من الاجازة السنوية (المادة 128).
كام تعويض الاجازة المرضية؟
75% من الاجر اليومي المسدد عنه الاشتراكات لمدة 90 يوم ثم 85% ، وبحد اقصى 180 يوم في السنة (المادة 76 من قانون التأمينات 148 لسنة 2019).
هل الموظف يقدر يتنازل عن اجازته ويقبض فلوسها؟
لا ، مينفعش يتنازل عنها ، لكن لو رفض كتابة ياخدها في الميعاد اللي اتحدد له بيسقط حقه في مقابلها ، وعند انتهاء الخدمة بياخد مقابل الرصيد (المادة 125).
هل في اجازة للأب عند الولادة؟
ايوه ، يوم واحد مدفوع يوم الولادة مش من رصيده ، بحد اقصى 3 مرات طول الخدمة (المادة 128).
خلاصة
الاجازات مش منحة من الشركة ، دي حقوق ليها حد ادنى في القانون وحد اعلى في سياسة شركتك. اكتبها في اللائحة ، وتابع الارصدة ، وسوّيها كل 3 سنين ، وهتقفل اغلب الخلافات قبل ما تبدأ.
وفي الختام ارجو يكون المقال افاد حضراتكم ولو بجزء بسيط في الشغل.
عايز سياسة اجازات مكتوبة وواضحة لشركتك؟
فريق كارييريانز يكتب لك سياسة الاجازات وملف متابعة الارصدة ويضيفهم للائحة تنظيم العمل مطابقين لقانون العمل 14 لسنة 2025 وقراراته.
تابع ايضا:
حساب تعويض اجر الاجازات المرضية بالتفصيل
ملخص قانون العمل الجديد – اهم 20 تغيير على صاحب العمل والشركات
تحميل اللائحة التنفيذية وقرارات وزير العمل لقانون العمل الجديد رقم 14 لسنة 2025
طريقة حساب اجر الاضافي وساعات العمل وفقا لقانون العمل الجديد رقم 14 لسنة 2025
كمان تقدر تتابع قناتنا على اليوتيوب لمزيد من الشروحات: إتعلم Personnel
هذا المقال شرح تحريري للمواد ٥٤ إلى ٥٧ و١٢٤ إلى ١٣١ و٢٨٨ من قانون العمل رقم ١٤ لسنة ٢٠٢٥ والمادة ٧٦ من قانون التأمينات الاجتماعية والمعاشات رقم ١٤٨ لسنة ٢٠١٩، والأمثلة الحسابية توضيحية. النص الرسمي المنشور هو المرجع المُعتد به، ولا يُغني هذا المقال عن الاستشارة القانونية أو المهنية في الحالات الفردية.
