تحميل نموذج عقد عمل محدد المدة وغير محدد المدة word وفقا لقانون العمل رقم 14 لسنة 2025
ايه اللي لازم يتكتب في عقد العمل وفقا لقانون العمل الجديد رقم 14 لسنة 2025؟
النهارده هنتكلم عن نموذج عقد عمل محدد المدة وغير محدد المدة word وفقا لقانون العمل رقم 14 لسنة 2025 ، ودا لأن عقد العمل هو اول ورقة في ملف اي موظف ، ولو اتكتب غلط كل اللي بعده بيبقى على اساس غلط.
في المقالة دي هنعرف البيانات الالزامية اللي حددها قرار وزير العمل 214 لسنة 2025 ، والفرق بين العقد محدد وغير محدد المدة ، وامتى العقد المحدد يتقلب غير محدد من غير ما تاخد بالك ، ومعاهم ملف Word واحد فيه النموذجين جاهزين للنوعين.
الاول متفقين إن المادة 89 من القانون بتلزم صاحب العمل يكتب العقد بالعربي من اربع نسخ: نسخة في ملف خدمة العامل ، ونسخة للعامل ، ونسخة تتودع في مكتب التأمين الاجتماعي ، والرابعة في الجهة الادارية المختصة. وقرار وزير العمل 214 لسنة 2025 جه يحدد البيانات الاساسية اللي لازم تبقى في العقد وطريقة كتابته وايداعه.
| السندم ٨٧ – ٩٩ وقرار ٢١٤ | عدد النسخ٤ نسخ | فترة الاختبار٣ شهور بحد اقصى | النماذجملف Word واحد |
البيانات الالزامية في عقد العمل
طبقا لقرار وزير العمل 214 لسنة 2025 ، عقد العمل لازم يتضمن على الاخص:
- اسم العامل ومؤهله ومهنته او حرفته ورقمه التأميني ، ومحل اقامته وما يلزم لاثبات شخصيته.
- طبيعة ونوع العمل محل العقد.
- الاجر المتفق عليه وطريقة وموعد ادائه.
- سائر المزايا النقدية والعينية المتفق عليها.
ودي البيانات الاساسية ، يعني كل شركة ممكن تزود عليها حسب شغلها: مكان العمل ، ساعات العمل ، فترة الاختبار ، التزامات التدريب ، والسرية. نموذجنا فيه كل ده.
خلي بالك. لو العامل اجنبي ومش بيجيد العربي ينفع العقد يتكتب بالعربي ولغة العامل ، ولو حصل اختلاف في التفسير العربي هو اللي بيتطبق (المادة 89).
الفرق بين العقد محدد المدة وغير محدد المدة
| وجه المقارنة | غير محدد المدة | محدد المدة |
|---|---|---|
| امتى يتعمل | الاصل في العلاقة | لما طبيعة العمل تقتضي ذلك (م ٨٧) |
| التجديد | — | باتفاق الطرفين لمدد مماثلة (م ٨٧) |
| الانتهاء | بارادة احد الطرفين بمبرر مشروع وكاف (م ١٥٧) | بانقضاء مدته (م ١٥٤) |
| الاخطار | ٣ شهور كتابة (م ١٥٦) | غير لازم عند انقضاء المدة |
| العقد اكتر من ٥ سنين | — | للعامل ينهيه بعد ٥ سنين باخطار ٣ شهور (م ١٥٤) |
امتى العقد يتعتبر غير محدد المدة من اول يوم؟
المادة 88 حددت 3 حالات العقد فيها يتعتبر غير محدد المدة منذ ابرامه:
- لو العقد مش مكتوب.
- لو العقد ما نصش على مدته.
- لو كان محدد المدة واستمر الطرفين في تنفيذه بعد انتهاء المدة من غير اتفاق مكتوب بينهم.
الأثر العملي: الحالة التالتة دي بتحصل كتير: العقد بيخلص والموظف كمل شغل عادي والتجديد اتنسى. وقتها العقد بقى غير محدد المدة من يوم ما اتعمل ، واي انهاء بعدها محتاج مبرر مشروع ومهلة اخطار 3 شهور. عشان كدا اعمل تنبيه قبل انتهاء كل عقد بشهر على الاقل وجدد كتابة.
فترة الاختبار وباقي البنود المهمة
فترة الاختبار
ما تزيدش عن 3 شهور ، ومينفعش تعين العامل تحت الاختبار اكتر من مرة واحدة عند نفس صاحب العمل (المادة 90).
الاجر والعلاوة
الاجر يتكتب بالتفصيل (اساسي وبدلات ومزايا) وموعد صرفه ، والعلاوة الدورية لا تقل عن 3% من الاجر التأميني بعد سنة (المادة 12).
ساعات العمل
حسب سياسة الشركة ، بحد اقصى 8 ساعات فعلية في اليوم او 48 في الاسبوع (المادة 117). الحساب الكامل للاضافي في مقال طريقة حساب اجر الاضافي.
التدريب على نفقة الشركة
لو الشركة دربت العامل على حسابها ، بيلتزم يقعد المدة المتفق عليها ، ولو مشي قبلها يسدد نفقات التدريب (المادة 95). المدة لازم تبقى مكتوبة في العقد.
انماط العمل الجديدة
لو الموظف بيشتغل عن بعد او مرن او بعض الوقت ، العقد لازم يبقى مكتوب ورقي او الكتروني (المادة 99) ، وليه نفس حقوق الموظف العادي (المادة 97).
مينفعش تغير الشغل من دماغك
المادة 91 بتمنع تكليف العامل بشغل غير المتفق عليه الا للضرورة (منع حادث او اصلاحه او قوة قاهرة) وبصفة مؤقتة ، او لو الشغل التاني مش مختلف عنه اختلاف جوهري.
خطوات تحرير العقد وايداعه
قبل اول يوم شغل
املا النموذج المناسب
محدد او غير محدد ، بالبيانات الالزامية ، واحذف الاختيارات اللي مش بتاعتك والملحوظات الداخلية.
يوم التوقيع
4 نسخ موقعة
نسخة لملف الخدمة ، ونسخة للموظف ، ونسخة لمكتب التأمينات ، ونسخة للجهة الادارية المختصة (المادة 89).
خلال اسبوعين
س1 في التأمينات
نسخة العقد بتتقدم مع س1 لمكتب التأمينات خلال اسبوعين من الالتحاق.
خلال 3 شهور بحد اقصى
نهاية فترة الاختبار
لو في فترة اختبار ، ما تعديش 3 شهور ومرة واحدة بس (المادة 90).
قبل انتهاء العقد المحدد بشهر
التجديد كتابة
جدد باتفاق مكتوب قبل الانتهاء ، والا العقد يتقلب غير محدد المدة (المادة 88).
ملحوظة ( مخالفة المادتين 89 و90 من ضمن المخالفات اللي عقوبتها غرامة من 500 لـ 5000 جنيه وبتتعدد بعدد العمال – المادة 288 ).
اسئلة شائعة عن عقد العمل في قانون العمل الجديد
كام نسخة من عقد العمل في القانون الجديد؟
اربع نسخ: لملف الخدمة ، وللعامل ، ولمكتب التأمين الاجتماعي ، وللجهة الادارية المختصة (المادة 89 وقرار 214 لسنة 2025).
هل العقد الشفوي صحيح؟
العلاقة بتتثبت ، لكن العقد اللي مش مكتوب بيتعتبر غير محدد المدة منذ ابرامه (المادة 88) ، وصاحب العمل ملزم بالكتابة (المادة 89).
اقصى مدة لفترة الاختبار كام؟
3 شهور ، ومرة واحدة بس عند نفس صاحب العمل (المادة 90).
ايه اللي يحصل لو العقد محدد المدة خلص والموظف كمل شغل؟
لو مفيش اتفاق مكتوب على التجديد ، العقد بيتعتبر غير محدد المدة منذ ابرامه (المادة 88 بند 3).
هل ينفع انهي العقد بالتراضي قبل ميعاده؟
ايوه ، باتفاق مكتوب فيه ما يفيد استلام العامل كل مستحقاته – شرحناه في مقال نموذج انهاء عقد العمل بالتراضي.
خلاصة
العقد الكويس مش ورقة بتتمضي وتتحط في الدرج ، ده المرجع اللي بيتحسم بيه اي خلاف بعدين. اكتبه بالبيانات الالزامية ، وحدد نوعه صح ، وتابع تواريخ انتهائه ، ووزع النسخ الاربعة.
وفي الختام ارجو يكون المقال افاد حضراتكم ولو بجزء بسيط في الشغل.
عايز عقود شركتك تتراجع على القانون الجديد؟
فريق كارييريانز يراجع نماذج عقود العمل عندك ويعدلها على قانون العمل 14 لسنة 2025 وقرار 214 ، ويجهز لك نماذج لكل نمط عمل في شركتك.
تابع ايضا:
ملخص قانون العمل الجديد – اهم 20 تغيير على صاحب العمل والشركات
تحميل نموذج انهاء عقد العمل بالتراضي word وفقا لقانون العمل الجديد
تحميل اللائحة التنفيذية وقرارات وزير العمل لقانون العمل الجديد رقم 14 لسنة 2025
تحميل قانون العمل الجديد – قانون العمل المصري الجديد رقم 14 لسنة 2025
كمان تقدر تتابع قناتنا على اليوتيوب لمزيد من الشروحات: إتعلم Personnel
هذا المقال شرح تحريري للمواد ٦ و١٢ و٨٧ إلى ٩٩ و١١٧ و١٥٤ إلى ١٥٧ و١٦١ و٢٨٨ من قانون العمل رقم ١٤ لسنة ٢٠٢٥ وقرار وزير العمل رقم ٢١٤ لسنة ٢٠٢٥، والنموذجان المرفقان استرشاديان يُعدَّلان حسب كل منشأة ووظيفة. النص الرسمي المنشور هو المرجع المُعتد به، ولا يُغني هذا المقال عن الاستشارة القانونية أو المهنية في الحالات الفردية.
