إمتى شركتك تحتاج HR من برّا بدل موظف HR داخلي؟ حسابها بالأرقام
إمتى شركتك تحتاج HR من برّا بدل موظف HR داخلي؟ حسابها بالأرقام
النهارده هنتكلم عن إمتى شركتك تحتاج HR من برّا بدل موظف HR داخلي ، وحسابها بالأرقام ، ودا لأن ناس كتير بتقارن مرتب الموظف بسعر الشركة اللي برا ، ودي مقارنة ناقصة: الموظف بيتكلف على الشركة اكتر من مرتبه.
في المقالة دي هنحسب التكلفة الكاملة لموظف HR داخلي بند بند (المرتب ، حصة صاحب العمل في التأمينات ، الجهاز ، التدريب ، التعيين ، ومخاطرة انه يمشي) ، ونقارنها بالتكلفة الكاملة للـ outsourcing ، ونطلع نقطة التعادل ، ونشوف امتى الارقام مش هي اللي تحسم ، ومعاها حاسبة excel تحط فيها ارقامك.
الاول متفقين إن المقارنة الصح بتبقى على نفس الشغل. لو الموظف الداخلي هيعمل حاجات الشركة اللي برا مش هتعملها (توظيف ، تدريب ، متابعة يومية في المكان) ، يبقى ده لازم يدخل في القرار. والارقام في المقال لشركة خيالية ، والحاسبة معمولة عشان تحط ارقامك انت.
| حصة صاحب العمل 2027١٩٫٢٥٪ | اجر الاشتراك 2027٣٬٢٠٠ – ١٩٬٣٠٠ | السندم ١٩ ق ١٤٨/٢٠١٩ | الملفExcel |
اولا: التكلفة الكاملة لموظف HR داخلي
التكلفة مش المرتب بس. دي البنود اللي الشركة بتدفعها فعلا في السنة:
| البند | بيتحسب ازاي | السند / ملحوظة |
|---|---|---|
| المرتب الشامل | الاجر الشهري × عدد شهور المرتب | عقد العمل |
| المكافآت والمنح السنوية | حسب سياسة الشركة | سياسة الشركة |
| حصة صاحب العمل في التأمينات | اجر الاشتراك × 19.25% × 12 | م 19 ق 148 لسنة 2019 – من يناير 2027 (كانت 18.75%) |
| صندوق اعانات الطوارئ | 1% من الاجر الاساسي لو المنشأة فيها 30 عامل فأكثر | القانون 156 لسنة 2002 |
| تأمين طبي ومزايا | حسب سياسة الشركة | سياسة الشركة |
| جهاز وبرامج | تمن الجهاز ÷ سنين استخدامه + الاشتراكات السنوية | تقدير الشركة |
| مكان وخدمات | نصيبه من الايجار والخدمات | تقدير الشركة |
| التدريب | كورسات وتحديث معلومات | تقدير الشركة |
| مخاطرة انه يمشي | احتمال الاستقالة × (تكلفة التعيين + شهور التسليم والتعلم × المرتب) | تقدير الشركة |
خلي بالك. اجر الاشتراك التأميني مش دايما هو المرتب الشامل: بيتحط بين حد ادنى وحد اقصى (3,200 و19,300 جنيه في 2027 – المادة 53 من اللائحة التنفيذية لقانون 148). وشرحنا النسب كلها في نسب التأمينات 2027 – الزيادة الجديدة على العامل وصاحب العمل ، وتكلفة اي موظف بالضريبة والصافي في التكلفة الحقيقية للموظف على الشركة.
تانيا: التكلفة الكاملة للـ outsourcing
- الرسوم الشهرية – من العرض المكتوب اللي جالك.
- رسوم البداية او التأسيس لو موجودة.
- الحاجات اللي بتتحسب لوحدها (حركات زيادة ، مشاوير ، شغل مستعجل).
- وقت حد جوه الشركة بينسق معاهم ويسلم المستندات – ده بيتكلف برضه.
والرسوم الحكومية نفسها بتدفعها في الحالتين ، عشان كدا مش داخلة في المقارنة.
تعالوا بقا نحسب: مثال لشركة خيالية
شركة خيالية فيها 25 موظف (يعني اقل من 30 ، فمفيش صندوق طوارئ) ، بتفكر تعين HR Specialist بمرتب شامل 14,000 جنيه واجر اشتراك 14,000. وجالها عرض outsourcing خيالي بـ 12,000 جنيه في الشهر. الارقام دي للتوضيح بس ، ومش اسعار سوق ولا اسعارنا.
مثال (1) – تكلفة الموظف الداخلي في السنة
المرتب :- 14,000 × 12 = 168,000 ج.
مكافأة شهر :- 14,000 ج.
حصة صاحب العمل في التأمينات :- 14,000 × 19.25% × 12 = 32,340 ج.
تأمين طبي :- 6,000 ج.
جهاز وبرامج :- 30,000 ÷ 3 سنين + 6,000 اشتراكات = 16,000 ج.
مكان وخدمات :- 1,000 × 12 = 12,000 ج.
تدريب :- 8,000 ج.
مخاطرة انه يمشي :- 25% × (10,000 تعيين + 2 × 14,000) = 9,500 ج.
الاجمالي = 265,840 ج في السنة ، يعني حوالي 22,153 ج في الشهر.
مثال (2) – تكلفة الـ outsourcing في السنة
الرسوم :- 12,000 × 12 = 144,000 ج.
رسوم البداية :- 5,000 ج.
وقت التنسيق الداخلي :- 2,000 × 12 = 24,000 ج.
حاجات بتتحسب لوحدها :- 3,000 ج.
الاجمالي = 176,000 ج في السنة.
265,840
موظف داخلي / سنة
176,000
HR من برّا / سنة
89,840
الفرق / سنة
19,487
نقطة التعادل / شهر
التكلفة السنوية في المثال (جنيه)
شركة خيالية – للتوضيح بس
يعني ايه نقطة التعادل؟
هي اعلى رسوم شهرية تخلي الـ outsourcing لسه مساوي لتكلفة الموظف :- (265,840 − 5,000 − 24,000 − 3,000) ÷ 12 = 19,486.67 ج في الشهر. اي عرض اقل من كدا ارخص بالارقام ، واي عرض اعلى منه يبقى الموظف الداخلي ارخص – بس ده بشرط ان الاتنين هيعملوا نفس الشغل.
الأثر العملي: لو الشركة وصلت 30 عامل فأكثر ، صندوق الطوارئ بيضيف 1% من الاساسي على تكلفة الموظف ، والحاسبة بتحسبه لما تختار “نعم” – وتفاصيله في طريقة حساب صندوق اعانات الطوارئ للعمال 2027. ولو اجر الاشتراك اعلى من 19,300 ، التأمينات بتتحسب على الحد الاقصى بس.
امتى الارقام مش هي اللي تحسم؟
الـ HR من برّا يبقى منطقي لو
- الشركة صغيرة والشغل الاداري (تأمينات ، مكتب عمل ، مرتبات) مش مالي يوم موظف كامل.
- مفيش حد جوه الشركة يقدر يراجع شغل موظف HR لوحده.
- محتاج تكمّل بسرعة بعد ما موظف الـ HR مشي.
- عايز التزام بالقانون من غير ما تبني قسم كامل.
الموظف الداخلي يبقى منطقي لو
- عدد الموظفين والحركات كبير والشغل يومي.
- التوظيف والتدريب وثقافة الشركة جزء كبير من الشغل.
- محتاج حد موجود في المكان كل يوم.
- عندك لوايح ونظام جاهزين وحد يقدر يتابع.
وفي حل وسط: موظف شئون عاملين جوه للشغل اليومي ، ومقدم خدمة برا للحاجات المتخصصة او المراجعة الدورية. حط الحل ده في الحاسبة كأنه “عرض” وقارنه. ولو شركتك لسه جديدة ابدأ من اول 10 خطوات HR لازم اي شركة جديدة تعملها قانونيا.
قبل ما تقرر
- احصر الشغل الاداري الشهري بالعدد (تعيينات ، استقالات ، تعديلات اجور).
- احسب التكلفة الكاملة للموظف ، مش المرتب بس.
- اطلب عروض مكتوبة بنطاق واضح من اكتر من جهة.
- حط الارقام في الحاسبة وشوف نقطة التعادل.
- راجع الحاجات اللي مش فلوس: السرية ، المواعيد ، وتسليم الملفات – لأن المادة 92 من قانون العمل 14 لسنة 2025 بتلزمك تحتفظ بملف كل عامل 5 سنين على الاقل من انتهاء العلاقة ، مهما كان مين بيدير الملف.
اسئلة شائعة عن HR outsourcing وموظف HR الداخلي
موظف HR بيتكلف الشركة كام فعلا؟
المرتب + حصة صاحب العمل في التأمينات (19.25% من اجر الاشتراك من يناير 2027 – المادة 19 من قانون 148) + المزايا والجهاز والتدريب ومخاطرة الاستقالة. في المثال الخيالي الاجمالي طلع 265,840 ج في السنة على مرتب 168,000.
هل الـ HR outsourcing ارخص دايما؟
لا. على حسب حجم الشغل والعرض. عشان كدا احسب نقطة التعادل بأرقامك انت.
لو اتعاقدت مع شركة برا ، المسؤولية القانونية عليها؟
الالتزامات في قانون العمل على صاحب العمل ، والعقد بينك وبين مقدم الخدمة هو اللي بيحدد ترجع عليه بايه.
ينفع اجمع بين الاتنين؟
ايوه: موظف جوه للشغل اليومي ومقدم خدمة للحاجات المتخصصة. حط التكلفة في الحاسبة وقارن.
النسب اللي في الحاسبة بتاعة 2026 ولا 2027؟
الحاسبة جاهزة بنسبة 2027 (19.25%) وحدود 3,200 و19,300. لو بتحسب على 2026 غيّرها من شيت الاعدادات لـ 18.75% وحدود 2,700 و16,700.
خلاصة Careerians
المقارنة الصح: التكلفة الكاملة للموظف قصاد التكلفة الكاملة للعرض ، على نفس الشغل. لو الفرق كبير الارقام بتحسم ، ولو صغير القرار بيبقى على الجودة والسرية والمواعيد. وخلي دايما هدفك مش انك “تدفع اقل” ، لكن انك “تدفع صح”.
وفي الختام ارجو يكون المقال افاد حضراتكم ولو بجزء بسيط في الشغل.
عايز تعرف تكلفة الـ outsourcing لشركتك؟
فريق كارييريانز بيدير شئون العاملين والتأمينات ومكتب العمل للشركات. اطلب عرض مكتوب بنطاق واضح ، وحطه في الحاسبة جنب تكلفة الموظف الداخلي ، وقرر بالأرقام.
تابع ايضا:
التكلفة الحقيقية للموظف على الشركة – حاسبة الراتب والتأمينات والضريبة والطوارئ excel
نسب التأمينات 2027 – الزيادة الجديدة على العامل وصاحب العمل مع حاسبة excel
اول 10 خطوات HR لازم اي شركة جديدة تعملها قانونيا
هل شركتك ملتزمة بقانون العمل الجديد؟ قائمة فحص 25 نقطة لمراجعة الالتزام
كمان تقدر تتابع قناتنا على اليوتيوب لمزيد من الشروحات: إتعلم Personnel
حصة صاحب العمل من المادة 19 من قانون التأمينات الاجتماعية 148 لسنة 2019 ، وحدود اجر الاشتراك 2027 من المادة 53 من اللائحة التنفيذية ، وصندوق الطوارئ من القانون 156 لسنة 2002 ، والاحتفاظ بملف العامل من المادة 92 من قانون العمل 14 لسنة 2025. الامثلة لشركة خيالية وارقامها للتوضيح ومش اسعار سوق.
