نموذج استقالة من العمل word 2026 – 3 صيغ جاهزة وفق قانون العمل 14 لسنة 2025
نموذج استقالة من العمل word 2026 – 3 صيغ جاهزة وفق قانون العمل 14 لسنة 2025
النهارده هنتكلم عن نموذج استقالة من العمل word 2026 ، ودا لأن من ساعة القانون الجديد والاستقالة مبقتش ورقة بتتسلم للـ HR وخلاص ، بقت ليها شكل واعتماد ومواعيد ، وغلطة واحدة فيها ممكن تخلي الموظف يفضل “على قوة الشركة” او تخلي الشركة متهمة انها فصلته.
في المقالة دي هنعرف الفرق بين 3 طرق لانهاء العقد من ناحية العامل: الاستقالة العادية ، والاخطار بانهاء العقد بمهلة 3 شهور ، والانهاء لاخلال صاحب العمل ، وامتى تستخدم كل واحدة ، وخطوات التقديم في مكتب العمل ، وحقوقك بعدها ، ومعاها ملف word فيه 4 نماذج جاهزة (التلاتة + نموذج العدول عن الاستقالة).
الاول متفقين إن الاستقالة في قانون العمل 14 لسنة 2025 لازم تبقى مكتوبة وموقعة منك او من وكيلك الخاص ، ومعتمدة من الجهة الادارية (مكتب علاقات العمل) ، والخدمة ما بتنتهيش الا بقرار قبولها او بمرور 10 ايام من تقديمها (المادة 167).
| الاعتمادمكتب علاقات العمل | رد الشركة10 ايام | العدول10 ايام من القبول | النماذج4 – Word |
3 طرق ينهي بيها العامل العقد
| الطريقة | امتى | المهلة | السند |
|---|---|---|---|
| الاستقالة | عايز تمشي وتنهي الخدمة بقرار قبول | الشركة ترد خلال 10 ايام وإلا تعتبر مقبولة | المادة 167 |
| الاخطار بانهاء العقد غير محدد المدة | عايز تنهي العقد بمبرر مشروع ومهلة | 3 شهور من تاريخ تسلم الاخطار | المواد 156 و157 و158 |
| الانهاء لاخلال صاحب العمل | الشركة اخلت بالتزام جوهري او حصل اعتداء عليك او على حد من اهلك | فوري | المادة 168 |
خلي بالك. الاستقالة في المادة 167 ملهاش مهلة اخطار ، والشركة بتبت فيها خلال 10 ايام. اما مهلة الـ 3 شهور فدي في المادة 156 لانهاء العقد غير محدد المدة ، وهي طريق مختلف. شرحنا الفرق ده في ملخص قانون العمل الجديد.
اولا: نموذج الاستقالة وخطوات اعتمادها
1
اكتب الاستقالة
على النموذج ، بياناتك وجهة عملك ، وتوقيعك او توقيع وكيلك الخاص.
2
اعتمدها
من مكتب علاقات العمل في المديرية اللي فيها المركز الرئيسي للشركة او احد فروعها ، ومعاك بطاقتك.
3
سلّمها للشركة
وخد ما يفيد الاستلام وتاريخه ، لأن منه بتبدأ العشر ايام.
4
استنى القرار
واستمر في شغلك ، ولو الشركة ما ردتش خلال 10 ايام تعتبر مقبولة.
والخطوات بالتفصيل وايه اللي بيحصل في المكتب تلاقيها في تقديم الاستقالة في مكتب العمل. وقرار وزير العمل 187 لسنة 2025 بيمنع ان صاحب العمل او اللي يمثله يقدم الاستقالة بالنيابة عن الموظف.
العدول عن الاستقالة
لو غيرت رأيك ، المادة 167 ادتك حق العدول خلال 10 ايام من اخطارك بقبول الاستقالة ، بشرط يبقى العدول مكتوب ومعتمد من الجهة الادارية ، وساعتها الاستقالة تعتبر كأن لم تكن. النموذج رقم 2 في الملف معمول للحالة دي.
تانيا: الاخطار بانهاء العقد غير محدد المدة
المادة 156 بتلزم اي طرف عايز ينهي العقد غير محدد المدة انه يخطر التاني كتابة قبلها بـ 3 شهور ، والمادة 157 بتشترط مبرر مشروع وكاف وان الانهاء يبقى في وقت مناسب لظروف العمل. والمهلة بتسري من تاريخ تسلم الاخطار ، وما ينفعش يتعلق على شرط (المادة 158).
وما ينفعش تتفق مع الشركة على تقليل المهلة ، بس صاحب العمل يقدر يعفيك منها كلها او بعضها لما تكون انت اللي بتنهي (المادة 161). ولو سبت الشغل قبل ما المهلة تخلص ، العقد بينتهي من وقت تركك العمل (المادة 164).
تالتا: انهاء العقد لاخلال صاحب العمل
المادة 168 بتدي العامل حق انهاء العقد لو صاحب العمل اخل بالتزام جوهري من التزاماته في القانون او العقد او اللائحة ، او لو حصل اعتداء على العامل او على حد من اهله من صاحب العمل او اللي يمثله. والانهاء في الحالة دي بيعتبر انهاء من جانب صاحب العمل بغير مبرر مشروع ، يعني بيفتح باب التعويض اللي في المادة 165 (لا يقل عن اجر شهرين عن كل سنة خدمة).
الأثر العملي: النموذج ده اقوى نموذج في الملف واخطرهم. قبل ما تستخدمه وثّق الاخلال بالمستندات (ايصالات الاجر ، المراسلات ، الشهود) ، واطلب التسوية الودية من لجنة مديرية العمل خلال 10 ايام من نشوء النزاع (المادة 149) ، واستشير محامي ، لأن عبء الاثبات عليك.
حقوقك بعد انتهاء العلاقة
- تسوية كل مستحقاتك المالية.
- شهادة خبرة خلال 15 يوم من طلبها ، فيها تاريخ الالتحاق والانتهاء ونوع العمل والمزايا ، ولو طلبت: الاجر وسبب الانتهاء (المادة 175).
- رد اوراقك وشهاداتك وادواتك وما يفيد اخلاء طرفك فور طلبك (المادة 175).
- الشركة بتقدم استمارة 6 للتأمينات – شرح استمارة 1 واستمارة 6.
ملحوظة هامة: اي ابراء من حقوق العامل خلال مدة العقد او خلال 3 شهور من انتهائه باطل (المادة 6). يعني ورقة “ابراء ذمة نهائي” مش بتسقط حقك ، والاصح انك تمضي على استلام مبالغ محددة.
اخطاء شائعة في الاستقالة
اعمل كدا
✓ اعتمد الاستقالة من مكتب علاقات العمل قبل ما تسلمها.
✓ خد ايصال استلام بتاريخ من الشركة.
✓ كمّل في شغلك لحد القرار او فوات الـ 10 ايام.
✓ احتفظ بنسخة معتمدة من كل ورقة.
ما تعملش كدا
✗ ما تسيبش الشغل يوم ما تقدم الاستقالة.
✗ ما تمضيش استقالة “على بياض” او من غير تاريخ.
✗ ما تخليش الشركة تعتمد الاستقالة بالنيابة عنك.
✗ ما تخلطش بين الاستقالة ومهلة الـ 3 شهور.
ولو انت والشركة متفقين على انهاء العلاقة ، في طريق رابع اسهل: الانهاء بالتراضي باتفاق مكتوب ، ومش محتاج اعتماد استقالة – تحميل نموذج انهاء عقد العمل بالتراضي.
اسئلة شائعة عن الاستقالة
هل الاستقالة لازم تتعتمد من مكتب العمل؟
ايوه ، لازم تبقى معتمدة من الجهة الادارية المختصة (المادة 167 وقرار 187 لسنة 2025).
الشركة بترد على الاستقالة خلال قد ايه؟
خلال 10 ايام من تقديمها ، ولو ما ردتش تعتبر مقبولة (المادة 167).
هل في مهلة اخطار للاستقالة؟
الاستقالة نفسها ملهاش مهلة. مهلة الـ 3 شهور في المادة 156 خاصة بانهاء العقد غير محدد المدة بالاخطار.
ينفع ارجع في الاستقالة؟
ايوه ، خلال 10 ايام من اخطارك بقبولها ، بعدول مكتوب ومعتمد (المادة 167).
اعمل ايه لو الشركة مش بتدفع المرتب؟
المادة 168 بتديك حق انهاء العقد لاخلال صاحب العمل بالتزام جوهري ، ويعتبر انهاء بغير مبرر مشروع من جانبه. وثّق واطلب التسوية الودية واستشير محامي.
شهادة الخبرة بتطلع امتى؟
خلال 15 يوم من طلبها (المادة 175).
خلاصة
حدد الاول انت عايز انهي طريق: استقالة (167) ، ولا اخطار بمهلة 3 شهور (156) ، ولا انهاء لاخلال صاحب العمل (168). واستخدم النموذج الصح ، واعتمد ، وخد ايصال ، واحتفظ بنسخة.
وفي الختام ارجو يكون المقال افاد حضراتكم ولو بجزء بسيط في الشغل.
محتاج حد يمسك ملفات شئون العاملين في شركتك؟
فريق كارييريانز بيدير ملفات التعيين والاستقالات ومكتب العمل والتأمينات للشركات ، ويضمن ان كل اجراء ماشي على قانون العمل 14 لسنة 2025.
تابع ايضا:
تقديم الاستقالة في مكتب العمل – الاجراءات وحقوق العامل والشركة
تحميل نموذج الاستقالة الجديد مع نموذج انهاء علاقه العمل بالتراضي
تحميل نموذج انهاء عقد العمل بالتراضي word
قانون العمل الجديد 14 لسنة 2025 – الدليل الشامل
كمان تقدر تتابع قناتنا على اليوتيوب لمزيد من الشروحات: إتعلم Personnel
الاحكام منقولة من نص قانون العمل رقم 14 لسنة 2025 (المواد 6 و149 و156 و157 و158 و161 و164 و165 و167 و168 و175) وقرار وزير العمل 187 لسنة 2025. النماذج استرشادية ، والمقال للتوعية وليس بديلا عن الاستشارة القانونية.
