حساب مستحقات نهاية الخدمة – رصيد الاجازات والمكافأة والتعويض مع شيت excel
حساب مستحقات نهاية الخدمة – رصيد الاجازات والمكافأة والتعويض مع شيت excel
النهارده هنتكلم عن حساب مستحقات نهاية الخدمة – رصيد الاجازات والمكافأة والتعويض ، ودا لأن اول سؤال بيتسأل يوم ما موظف يمشي: “هو ليه كام؟” ، والاجابة بتختلف تماما على حسب سبب انتهاء الخدمة: استقالة ولا فصل ولا انتهاء عقد ولا وفاة.
في المقالة دي هنعرف كل بند من المستحقات في قانون العمل 14 لسنة 2025 وسنده بالمادة: مقابل رصيد الاجازات ، وبدل مهلة الاخطار ، وتعويض الفصل بغير مبرر ، ومكافأة العقد محدد المدة ، ومستحقات الوفاة ، ونحسبهم مع بعض بامثلة بالارقام ، ومعاهم شيت excel بيحسب كل ده لوحده.
الاول متفقين إن مش كل موظف بيمشي ليه تعويض. اللي ليه في كل الحالات هو اجر الايام اللي اشتغلها ومقابل رصيد اجازاته اللي ما اخدهاش (المادة 125). اما التعويض والمكافأة وبدل الاخطار فدول مربوطين بسبب الانتهاء ونوع العقد.
| رصيد الاجازاتالمادة ١٢٥ | تعويض الفصلشهرين عن كل سنة – م ١٦٥ | مهلة الاخطار٣ شهور – م ١٥٦ | الصرفخلال ٧ ايام – م ١٠٨ |
المستحقات حسب سبب انتهاء الخدمة
قبل اي حساب لازم تحدد الموظف ده خرج ازاي ، لأن كل سبب بيفتح بنود مختلفة. الجدول ده بيلخص اللي في القانون:
| سبب الانتهاء | المستحقات | السند |
|---|---|---|
| استقالة او انهاء بالتراضي او انتهاء عقد محدد المدة بانقضاء مدته | اجر الايام الاخيرة + مقابل رصيد الاجازات | م 108 ، م 125 |
| صاحب العمل انهى عقد محدد المدة اتبرم او اتجدد لاكتر من 5 سنين | + مكافأة اجر شهر عن كل سنة خدمة | م 154 |
| صاحب العمل انهى عقد غير محدد المدة بمبرر مشروع | + بدل مهلة الاخطار لو ما اتقضتش | م 156 ، م 164 |
| صاحب العمل انهى عقد غير محدد المدة بغير مبرر مشروع | + بدل المهلة + تعويض لا يقل عن اجر شهرين عن كل سنة | م 164 ، م 165 |
| العامل انهى العقد لأن صاحب العمل اخل بالتزام جوهري | بمثابة انهاء بغير مبرر مشروع من صاحب العمل | م 168 |
| وفاة العامل وهو في الخدمة | + نفقات جنازة اجر شهرين (حد ادنى 1000 ج) + منحة 3 شهور | م 169 |
| انهاء لأسباب اقتصادية (اغلاق او تقليص بقرار اللجنة المختصة) | + مكافأة شهر عن كل سنة من اول 5 سنين وشهر ونص عن كل سنة بعدها | م 241 |
خلي بالك. الارقام اللي في القانون حد ادنى. لو عقد الموظف او لايحة الشركة او اتفاق التراضي فيه ميزة افضل (زي مكافأة نهاية خدمة من نظام الشركة) بتتضاف ، لأن المادة 6 بتقول ان المزايا الافضل المقررة في العقود واللوايح والعرف بيستمر العمل بيها.
اولا: مقابل رصيد الاجازات – المادة 125
المادة 125 بتلزم صاحب العمل انه يسوي رصيد الاجازات او الاجر المقابل له كل 3 سنين على الاكتر ، ونصت كمان: “فإذا انتهت علاقة العمل قبل استنفاد العامل رصيد إجازته السنوية استحق الأجر المقابل لهذا الرصيد”. يعني الرصيد اللي ما اتصرفش بيتحول فلوس يوم الخروج ، مهما كان سبب الانتهاء.
وعدد ايام الاجازة نفسه في المادة 124: 15 يوم في السنة الاولى ، و21 يوم من السنة التانية ، و30 يوم لمين قضى 10 سنين او عدى الخمسين ، و45 يوم للاشخاص ذوي الاعاقة والاقزام. والتفاصيل كلها في الاجازات في قانون العمل الجديد – السنوية والمرضية والعارضة والوضع وطريقة حسابها.
طيب اجر اليوم بيتحسب ازاي؟
هنا لازم نبقى واضحين: القانون ما حددش رقم تقسم عليه الاجر الشهري عشان يطلع اجر اليوم. الشائع في الشغل ان الاجر الشهري بيتقسم على 30 ، وفي شركات بتقسم على 26 (ايام العمل الفعلية). دي سياسة الشركة ، ولازم تبقى مكتوبة في اللايحة وتتطبق على الكل بنفس الطريقة.
مثال: موظف اجره 12,000 جنيه ورصيده 18 يوم. على سياسة القسمة على 30 :- 12,000 ÷ 30 = 400 ج × 18 = 7,200 ج. وعلى سياسة القسمة على 26 :- 12,000 × 18 ÷ 26 = 8,307.69 ج. عشان كدا الشيت بيسيبلك الرقم ده تكتبه في “الاعدادات”.
ملحوظة هامة: نفس المادة 125 بتقول ان العامل لو رفض كتابة انه يقوم بالاجازة اللي حددها صاحب العمل ، سقط حقه في اقتضاء مقابلها. يعني لو الشركة حددت للموظف اجازته واخطرته ورفض كتابة ، الايام دي ما بتتحولش فلوس. عشان كدا وثّق جدول الاجازات واخطارات الموظفين.
تانيا: بدل مهلة الاخطار – المواد 156 و164
في العقد غير محدد المدة ، اي طرف عايز ينهيه لازم يخطر التاني كتابة قبلها بـ 3 شهور (المادة 156) ، وما ينفعش الاتفاق على تقليل المهلة لكن ينفع زيادتها (المادة 161). ولو صاحب العمل انهى العقد من غير اخطار او قبل ما المهلة تخلص ، بيدفع للعامل اجره عن المهلة او الجزء الباقي منها (المادة 164).
والمادة 164 فيها نقطة ناس كتير بتنساها: المهلة او الجزء الباقي منها بيتحسب ضمن مدة خدمة العامل. يعني لو الموظف اتفصل من غير اخطار ، الـ 3 شهور بتتضاف على مدته قبل ما تحسب التعويض. وكمان صاحب العمل يقدر يعفي العامل من الشغل اثناء المهلة بس بيصرف اجرها والمدة بتفضل محسوبة (المادة 163).
مثال سريع: موظف اجره 10,000 جنيه ، الشركة اخطرته واشتغل شهر واحد من المهلة وبعدين قالتله امشي النهارده. الباقي من المهلة شهرين :- 2 × 10,000 = 20,000 ج بدل اخطار.
تالتا: تعويض الفصل بغير مبرر مشروع – المادة 165
المادة 165 بتقول ان صاحب العمل لو انهى العقد غير محدد المدة لسبب غير مشروع ، يبقى للعامل الحق في تعويض بما لا يقل عن اجر شهرين عن كل سنة من سنوات الخدمة ، وده من غير ما يخل بباقي حقوقه. ومن الاسباب غير المشروعة اللي ذكرتها المادة: الانضمام لنقابة ، تقديم شكوى او رفع دعوى على صاحب العمل ، استخدام العامل لحقه في الاجازات ، والحمل او الحالة الاجتماعية او الدين.
وكلمة “لا يقل عن” معناها ان شهرين عن كل سنة هو الحد الادنى ، والمحكمة العمالية ممكن تحكم باكتر على حسب الضرر. وشرحنا الفرق بين الفصل بمبرر والفصل التعسفي بالتفصيل في فترة الاختبار والفصل والتعويض في قانون العمل الجديد – شرح كامل بالامثلة.
الأثر العملي: المادة 168 بتدي العامل حق ينهي العقد لو صاحب العمل اخل بالتزام جوهري (زي عدم صرف الاجر) او حصل عليه او على حد من اهله اعتداء ، والانهاء ده بيعتبر “بمثابة انهاء من جانب صاحب العمل بغير مبرر مشروع”. يعني نفس باب التعويض بيتفتح حتى لو العامل هو اللي مشي.
طيب كسر السنة بيتحسب ازاي؟
القانون قال “عن كل سنة من سنوات الخدمة” ومحددش بيتعمل ايه في الشهور الزيادة. الشيت بيحسبها نسبي افتراضيا (8 سنين و3 شهور = 8.25 سنة) ، وتقدر تخليه يحسب السنوات الكاملة بس لو دي سياسة شركتك او اللي اتفقتوا عليه. ولو في نزاع المحكمة هي اللي بتقدّر.
رابعا: مكافأة العقد محدد المدة – المادة 154
العقد محدد المدة بينتهي بانقضاء مدته ، ومفيش فيه تعويض لمجرد ان مدته خلصت. لكن المادة 154 قالت لو العقد اتبرم او اتجدد لمدة تزيد على 5 سنين ، العامل يقدر ينهيه من غير تعويض بعد 5 سنين باخطار 3 شهور ، “فإذا كان الإنهاء من جانب صاحب العمل استحق العامل مكافأة تعادل أجر شهر عن كل سنة من سنوات الخدمة”.
خامسا: مستحقات الوفاة – المادة 169
لو العامل اتوفى وهو في الخدمة ، المادة 169 بتلزم صاحب العمل يصرف لأسرته ما يعادل اجر شهرين على آخر اجر قبضه لمواجهة نفقات الجنازة ، بحد ادنى 1000 جنيه ، وبتتصرف للأرمل ، ولو مفيش لأرشد الاولاد ، او لأي حد يثبت انه اتحمل النفقات.
وكمان بتتصرف منحة تعادل اجر العامل عن شهر الوفاة والشهرين اللي بعده ، غير اجر ايام الشغل في شهر الوفاة ، وبتتصرف طبقا لقانون التأمينات الاجتماعية. والمادة 33 من قانون التأمينات 148 لسنة 2019 بتقول ان الجهة اللي كانت بتصرف الاجر هي اللي بتلتزم بالمنحة. وصاحب العمل بيتحمل كمان نفقات تجهيز ونقل الجثمان للجهة اللي استقدم العامل منها او اللي اسرته تطلبها.
سادسا: الاسباب الاقتصادية والعامل بعد سن الستين
لو انتهت الخدمة لأسباب اقتصادية (اغلاق كلي او جزئي او تقليص حجم المنشأة او نشاطها بقرار من اللجنة المختصة) ، المادة 241 قالت: “وفى جميع الأحوال، يستحق العامل مكافأة تعادل أجر شهر عن كل سنة من السنوات الخمس الأولى من سنوات الخدمة وشهر ونصف الشهر عن كل سنة تجاوز ذلك”. مثال: موظف اجره 10,000 جنيه وخدمته 8 سنين :- 10,000 × 5 + 15,000 × 3 = 95,000 ج.
وفي حالة خاصة كمان في المادة 172: العامل اللي اشتغل بعد سن الستين وملوش حقوق عن المدة دي في تأمين الشيخوخة والعجز والوفاة ، بيستحق عنها مكافأة نص شهر عن كل سنة من اول 5 سنين وشهر عن كل سنة بعدها ، على آخر اجر. دي الشيت ما بيحسبهاش لأنها عن مدة معينة بس ، احسبها لوحدها.
تعالوا بقا نحسب بشكل عملي
مثال (1) موظف اجره الشامل 12,000 جنيه ، عقد غير محدد المدة ، اشتغل من 1/3/2018 لحد 28/2/2026 ، واتفصل بغير مبرر مشروع ومن غير اخطار ، ورصيد اجازاته 18 يوم. ليه كام؟
اجر اليوم (سياسة الشركة ÷ 30) :- 12,000 ÷ 30 = 400 ج.
مقابل رصيد الاجازات :- 400 × 18 = 7,200 ج.
بدل مهلة الاخطار :- 3 × 12,000 = 36,000 ج.
مدة الخدمة بعد اضافة المهلة (م 164) :- 8 سنين + 3 شهور = 8.25 سنة.
التعويض (الحد الادنى) :- 2 × 12,000 × 8.25 = 198,000 ج.
الاجمالي :- 7,200 + 36,000 + 198,000 = 241,200 ج.
7,200
رصيد الاجازات – م 125
36,000
بدل الاخطار – م 164
198,000
التعويض – م 165
241,200
الاجمالي (جنيه)
مثال (2) موظف اجره 9,000 جنيه ، عقده محدد المدة واتجدد لاكتر من 5 سنين ، من 1/1/2020 لحد 30/6/2026 ، وصاحب العمل هو اللي انهاه ، ورصيده 10 ايام.
مدة الخدمة :- 6 سنين و6 شهور = 6.5 سنة.
المكافأة (م 154) :- 9,000 × 6.5 = 58,500 ج.
مقابل الرصيد :- 9,000 ÷ 30 × 10 = 3,000 ج.
الاجمالي :- 58,500 + 3,000 = 61,500 ج.
مثال (3) موظف اجره 8,000 جنيه اتوفى يوم 15 في الشهر ، وما اتقبضش اجر الـ 15 يوم دول ، ورصيده 6 ايام.
اجر ايام شهر الوفاة :- 8,000 ÷ 30 × 15 = 4,000 ج.
مقابل الرصيد :- 8,000 ÷ 30 × 6 = 1,600 ج.
نفقات الجنازة :- 2 × 8,000 = 16,000 ج (اكبر من الحد الادنى 1000).
المنحة :- 3 × 8,000 = 24,000 ج.
الاجمالي :- 4,000 + 1,600 + 16,000 + 24,000 = 45,600 ج.
مثال (4) موظفة اجرها 7,500 جنيه قدمت استقالتها واتقبلت ، ورصيدها 21 يوم.
مقابل الرصيد :- 7,500 ÷ 30 × 21 = 5,250 ج ، ومفيش تعويض ولا بدل اخطار لأن الانهاء من ناحيتها. وخطوات الاستقالة نفسها في تقديم الاستقالة في مكتب العمل – الاجراءات وحقوق العامل والشركة.
ملحوظه: الامثلة على سياسة القسمة على 30 وكسر السنة النسبي ، ونفس الارقام دي هتطلعلك في الشيت لو كتبتها. ولو شركتك بتقسم على 26 الرقم هيتغير زي ما شرحنا فوق.
كشف التسوية اللي تجهزه للموظف
مخالصة / كشف مستحقات نهاية الخدمة
ملحوظة هامة: المادة 6 بتبطل اي ابراء من حقوق العامل الناشئة عن العقد خلال مدة سريانه او خلال 3 شهور من انتهائه. يعني ورقة “ابراء ذمة نهائي” اللي بيمضيها الموظف يوم خروجه ما بتسقطش حقه. الاصح ان المخالصة تبقى “استلمت مبلغ كذا عن البنود الاتية”. ولو الانهاء بالتراضي ، اكتب المبالغ المتفق عليها في الاتفاق نفسه – تحميل نموذج انهاء عقد العمل بالتراضي word وفقا لقانون العمل الجديد.
قائمة تنفيذ قبل ما تصرف المستحقات
- حدد سبب الانتهاء ونوع العقد — لأنهم اللي بيحددوا البنود.
- راجع رصيد الاجازات — من سجل الاجازات ، واتأكد من اي رفض كتابي للقيام بالاجازة (م 125).
- اكتب اجر اليوم حسب لايحتك — ÷ 30 او ÷ 26 ، ونفس الطريقة لكل الموظفين.
- احسب المهلة — اتقضى منها قد ايه ، والباقي بيتضاف على مدة الخدمة (م 164).
- جهّز كشف تسوية — بند بند بسنده ، ومن غير ابراء ذمة نهائي (م 6).
- اصرف خلال 7 ايام — من تاريخ مطالبة العامل (م 108 بند 4).
- سلّم شهادة الخبرة — خلال 15 يوم من طلبها ، ورد اوراقه وشهاداته فور طلبها (م 175).
وعشان تعرف المستحقات دي بتأثر ازاي على تكلفة الموظف على الشركة طول مدة خدمته ، شوف التكلفة الحقيقية للموظف على الشركة – حاسبة الراتب والتأمينات والضريبة والطوارئ excel.
اسئلة شائعة عن مستحقات نهاية الخدمة
هل الموظف المستقيل ليه مكافأة نهاية خدمة؟
المادة 167 بتاعة الاستقالة ما قررتش مكافأة. المستقيل ليه اجر ايامه ومقابل رصيد اجازاته (م 125) ، الا لو عقده او لايحة الشركة فيها مكافأة افضل (م 6).
تعويض الفصل التعسفي كام في القانون الجديد؟
لا يقل عن اجر شهرين عن كل سنة من سنوات الخدمة في العقد غير محدد المدة (م 165) ، غير بدل مهلة الاخطار لو ما اتقضتش (م 164).
رصيد الاجازات بيتصرف ولا بيسقط؟
بيتصرف. لو العلاقة انتهت قبل ما الموظف يستنفد رصيده بيستحق الاجر المقابل (م 125) ، الا لو رفض كتابة القيام بالاجازة اللي حددها صاحب العمل.
اجر اليوم بيتحسب على 30 ولا 26؟
القانون ما حددش. دي سياسة الشركة في اللايحة ، والشائع 30.
المستحقات بتتصرف خلال قد ايه؟
خلال 7 ايام بحد اقصى من تاريخ مطالبة العامل بيها (م 108 بند 4).
الموظف لو اتوفى اسرته تاخد ايه؟
نفقات جنازة اجر شهرين بحد ادنى 1000 جنيه ، ومنحة اجر شهر الوفاة والشهرين التاليين ، غير اجر ايام الشغل ورصيد الاجازات (م 169).
خلاصة
حدد سبب الانتهاء ونوع العقد الاول ، وبعدين اجمع البنود: اجر الايام ورصيد الاجازات في كل الحالات ، وبدل الاخطار والتعويض في الفصل من العقد غير محدد المدة ، والمكافأة في العقد محدد المدة اللي عدى 5 سنين ، ومستحقات الوفاة لو حصلت. واكتب سياسة اجر اليوم وكسر السنة في اللايحة عشان الحساب يبقى واحد للكل.
وفي الختام ارجو يكون المقال افاد حضراتكم ولو بجزء بسيط في الشغل.
محتاج حد يمسك تسويات نهاية الخدمة في شركتك؟
فريق كارييريانز بيدير شئون العاملين والمرتبات للشركات: تسويات نهاية الخدمة ، والاجازات ، وملفات مكتب العمل والتأمينات ، على قانون العمل 14 لسنة 2025.
تابع ايضا:
فترة الاختبار والفصل والتعويض في قانون العمل الجديد – شرح كامل بالامثلة
الاجازات في قانون العمل الجديد – السنوية والمرضية والعارضة والوضع وطريقة حسابها
تقديم الاستقالة في مكتب العمل – الاجراءات وحقوق العامل والشركة
قانون العمل الجديد 14 لسنة 2025 – الدليل الشامل
كمان تقدر تتابع قناتنا على اليوتيوب لمزيد من الشروحات: إتعلم Personnel
الاحكام منقولة من نص قانون العمل رقم 14 لسنة 2025 (المواد 1 و6 و108 و124 و125 و154 و156 و161 و163 و164 و165 و167 و168 و169 و172 و175 و241) والمادة 33 من قانون التأمينات الاجتماعية 148 لسنة 2019. القسمة على 30 او 26 وطريقة حساب كسر السنة سياسة شركة مش نص قانون. المقال للتوعية وليس بديلا عن الاستشارة القانونية في الحالات الفردية.
